नेकपा माओवादी केन्द्रका अध्यक्ष पुष्पकमल दाहाल प्रचण्डले निर्वाचनका लागि आवस्यक अध्ययन, विश्लेषण र योजना बनाउन पार्टी कार्यकर्ताहरूलाई निर्देशन दिएका छन् । आइतवार पार्टीमा ५ बुँदे आन्तरिक सर्कुलर जारी गर्दै प्रचण्डले २०७९ साल निर्वाचन वर्ष हुने भन्दै तयारी थाल्न निर्देशन दिएका हुन् । 

‘आगामी वर्ष २०७९ निर्वाचन वर्ष हुने कुरा स्पष्ट नै छ । त्यसैले त्यसका निम्ती आवस्यक अध्ययन विश्लेषण र योजना निर्माण कार्यका लागि पहल शुरु गर्न निर्देशन दिइन्छ’ चौथो नम्बरको निर्देशनमा भनिएको छ । 
प्रचण्डले माघ १२ गते हुने राष्टिय सभा निर्वाचनमा गठबन्धनका उम्मेदवारलाई विजयी बनाउन पनि कार्यकर्तालाई निर्देशन दिएका छन् ।

प्रदेशका अध्यक्ष र इन्चार्जलाई सम्वोधन गरिएको परिपत्रमा रोकिएको केन्द्रीय कमिटी बैठक माघ २७ गतेदेखि काठमाडौंमा शुरु हुने र त्यसले पदाधिकारी, पोलिटब्युरो र स्थायी कमिटीको टुंगो लगाउने प्रचण्डले उल्लेख गरेका छन् । 

स्थानीय तहको चुनाव वैशाखमा गर्ने कि पर सार्ने भन्नेबारे सत्ता गठबन्धन भित्र छलफल चलिरहेको समयमा प्रचण्डले चुनावको विश्लेषण थाल्न पार्टीभित्र निर्देशन दिएका हुन् ।