प्रधानमन्त्री निवास बालुवाटारमा बसेको सत्तारुढ गठबन्धनको बैठक स्थगित भएको छ । अपरान्ह ४ बजे फेरि बस्ने गरी गठबन्धनको बैठक स्थगित भएको हो । 

नेताहरूको व्यस्तताको कारण बैठक स्थगित भएको नेकपा एकीकृत समाजवादीका महासचिव बेदुराम भुसालले जानकारी दिए ।

आजको बैठकमा स्थानीय तहको निर्वाचनको बारेमा विस्तृतमा छलफलको बताइएको छ । 

‘बैठकमा निर्वाचनकै विषयमा केन्द्रित रहेर छलफल भयो । तर, छलफल अन्तिम निष्कर्षमा पुगिसकेको छैन । ४ बजे फेरि बसेर टुंगो लगाउँछौं,’ भुसालले भने । 

स्थानीय तहको निर्वाचन सार्ने पक्षका रहेको गठबन्धनका नेताहरू पुनः वैशाखमै निर्वाचन गर्ने पक्षमा फर्किएका छन् । 

विशेषगरी माओवादी केन्द्र र नेकपा एकीकृत समाजवादीको कारण निर्वाचन सार्न लागिएको भनेर सबैतिर आलोचना भएपछि नेताहरू वैशाखमै निर्वाचन गर्ने पक्ष देखिएका छन् । 

गठबन्धनको नेतृत्व गरिरहेको नेपाली कांग्रेसभित्र पनि जुनसुकै अवस्थामा वैशाखमै निर्वाचन गर्नुपर्ने मत बलियो छ । प्रधानमन्त्री एवं कांग्रेस सभापति देउवाले त्यसलाई नकार्न सक्ने अवस्थामा छैनन् । 

प्रमुख प्रतिपक्ष दल नेकपा एमाले पनि वैशाखमै चुनाव गराउनुपर्ने माग गरिरहेको छ ।

संसदका दुई ठूला दलहरू वैशाखमै स्थानीय तहको  निर्वाचन गर्नुपर्ने पक्षमा भएपछि गठबन्धनलाई पनि दबाब परेको छ । 

निर्वाचन आयोगले पनि वैशाखमै चुनाव गनुपर्ने भनेर दबाब दिइरहेको छ । आयोगले एकै तहमा निर्वाचन गर्दा वैशाख १४ र दुई चरणमा निर्वाचन गर्दा वैशाख १४ र २२ को मिति प्रस्ताव गरेको छ । 

निर्वाचन सम्पन्न गराउन १२० दिनको समय चाहिने भएकाले चाँडो मिति घोषणा गर्न आयोगले सरकारलाई दबाब दिइरहेको छ । 

स्थानीय तह निर्वाचन ऐन अनुसार आगामी जेठ ५ गते अगाडि नै स्थानीय तहको निर्वाचन गर्नुपर्ने प्रावधान छ ।