विवादको भुमरीमा परेको अमेरिकी आर्थिक सहयोग कार्यक्रम मिलेनियम च्यालेन्ज कम्प्याक्ट (एमसीसी) आज प्रतिनिधि सभा बैठकमा टेबल हुने संकेत देखिएको छ ।

एमसीसी संसद्मा टेबल गर्न सत्ता गठबन्धन दलहरूबीच सहमति जुटेको हो । प्रधानमन्त्री निवास बालुवाटारमा आइतवार बिहान बसेको गठबन्धन बैठकमा एमसीसी टेबल गर्ने सहमति जुटेको नेकपा एस स्रोतले बतायो । 

गठबन्धनमा सहमति जुटेसँगै आइतवार दिउँसो १ बजे बस्ने बैठकमा एमसीसी सम्झौता पेश गर्ने सरकारको तयारी छ । संसद् बैठकअघि बिहान साढे ११ बजे कार्यव्यवस्था परामर्श समितिको बैठक राखिएको छ ।

गत बुधवार र शुक्रवारको बैठकमा कानून मन्त्री दिलेन्द्र बडूले एमसीसी संसद्मा टेबल गर्न प्रस्ताव गरेका थिए ।

प्रमुख प्रतिपक्षी दल नेकपा एमालेको अवरोधका बावजूद सरकारले एमसीसी टेबल गर्ने तयारी गरेको छ ।

माधव नेपाललगायत १४ सांसद माथिको कारवाही सदर नगरेको विरोधमा एमालेले लामो समयदेखि प्रतिनिधि सभामा अवरोध जारी राखेका छन् ।

 कार्वाहीको माग गर्दै एमालेले लामो समयदेखि प्रतिनिधि सभामा अवरोध जारी राखेको छ।