नेकपा एकीकृत समाजवादीका ‘सम्मानित नेता’ झलनाथ खनालले संसद्मा जबर्जस्ती एमसीसी टेबल गरेर संविधान मिचिएको बताएका छन् । 

संसद बैठकमा सहभागी भएर फर्किने क्रममा संक्षिप्त प्रक्रिया दिँदै खनालले संविधानको व्यवस्था भन्दा बाहिरबाट संसदमा एमसीसी टेबल गरेर गलत काम भएको दाबी गरेका हुन् । 

‘संविधानमा संघीय ऐन बनाएर मात्रै सन्धि सम्झौता संसद ल्याउन र अनुमोदन गर्न मिल्ने भनेको छ । संघीय ऐन नै नबनाई संविधान मिचेर जबरजस्ती टेबल गर्ने काम भयो । यो संविधान विरोधी काम हो,’ खनालले भने । 

प्रमुख प्रतिपक्षी दलको अवरोधका कारण संसद नचलेको बेला दीर्घकालीन महत्त्व र राष्ट्रिय स्वाधीनतासँग जोडिएको विषयलाई जबर्जस्ती प्रस्तुत गरिनु लज्जास्पद विषय भएको खनालले बताए ।

अमेरिकाको दबाबले नेपाल नै विभाजित भइरहेको खनालको भनाइ छ । ‘संसद् पनि विभाजित भएको छ । एउटा नाथे आर्थिक सम्झौताले देश विभाजित गर्न मिल्छ ? यो लज्जास्पद विषय हो,’ खनालले भने ।

उनको पार्टी एकीकृत समाजवादीले एमसीसी संसदमा टेबुल गर्न दिने निर्णय नगरेको पनि खनालले बताए । 

जसले संसद टेबल गर्न दिने निर्णय भएको बताए त्यो उनीहरूको व्यक्तिगत कुरा भएको पनि खनालको भनाइ छ ।