आइतवार बसेको प्रदेश १ को प्रदेश सभा बैठकमा सरकारविरुद्ध एमाले आक्रामक रुपमा प्रस्तुत भएको छ । 

एमाले संसदीय दलका नेता तथा निवर्तमान मुख्यमन्त्री भीमप्रसाद आचार्यलगायतका एमाले सांसदहरू सरकारविरुद्ध कडा रुपमा प्रस्तुत भएका हुन् । 

विकास कटौती गरेर भागवण्डा गर्ने, कुर्सी च्यापेर झण्डा हल्लाउने काममा मात्रै सरकार लागेको आचार्यको आरोप छ । ‘संघीयता यही तालले जाने हो भने संघीयता भार र अभिसाप हुन्छ,’ उनले भने । 

यस्तै शून्य समयमा बोल्दै एमाले सांसद उषाकला राईले मन्त्रालय फुटाएर १४ जना मन्त्री बनाएको भन्दै सरकार कहाँ छ भनेर प्रश्न गरिन् । 

अर्का सांसद काजिमान कागतेले ‘मन्त्रालयको संख्या २६ पुर्‍याउन आग्रह गर्छु’ भन्दै व्यंग्य गरे । 

एमालेकै सांसद विमल कार्कीले प्रदेशले नाम नपाएको भन्दै विरोध गरे । 

सांसद राजकुमार ओझाले खोलाहरूमा मापदण्ड विपरीत उत्खनन भएको बताए । 

सांसद रामबहादुर मगरले बागवानी केन्द्रलाई जिल्ला ज्ञान केन्द्रमा राख्ने सरकरको निर्णयको विरोध गरेका छन् ।

सांसद सर्वध्वज साँवाले यो सरकारले फोडफाड गर्न मात्रै जानेको भन्दै विरोध जनाए । 

सत्तारुढ दलकी सांसद सरिता थापाले लेटाङ–८ मा बलात्कारपछि हत्या भएको घटनाको जानकारी गराउँदै बलात्कारीलाई फासीको सजाय दिन माग गरिन् ।

प्रदेश सभा बैठकमा प्रदेश अनुसन्धान तथा प्रशिक्षण प्रतिष्ठान सम्बन्धमा व्यवस्था गर्न बनेको विधेयक, २०७८’ माथिको सैद्धान्तिक छलफल भएको छ । 

प्रदेश सभाको अर्काे बैठक भोलि सोमवार दिउँसो १ बजेसम्मका लागि स्थगित गरिएको संसद सचिवालयले जनाएको छ ।