प्रधानमन्त्री शेरबहादुर देउवाले अमेरिकी विदेशमन्त्री एन्टोनी ब्लिन्केनसँग टेलिफोन वार्ता गरेर नेपालको गरीबी निवारणबारे कुराकानी गरेका छन् ।

बुधवार बिहीवार सामाजिक सञ्जाल ट्विटरमार्फत जानकारी दिँदै प्रधानमन्त्री देउवाले नेपालको प्रगतिका लागि अमेरिकाले ७५ वर्षदेखि निरन्तर गरिरहेको समर्थनको कदर समेत गरेका छन् ।

देउवाले लेखेका छन्, ‘अमेरिकी विदेशमन्त्री एन्टोनी ब्लिन्केनसँग नेपालको गरीबी निवारण, विकास र जलवायु परिवर्तनको मुद्दामा वार्ता गरे । हाम्रो प्रगतिमा निरन्तर ७५ वर्षको अमेरिकी समर्थनका लागि कदर गर्छौं । हामीले युक्रेनमा रुसको आक्रमण र युक्रेनको सार्वभौमसत्ताप्रतिको हाम्रो समर्थनबारे पनि छलफल गर्‍यौं ।’

यसअघि विदेशमन्त्री एन्टोनीले ट्वीट गर्दै रुसले युक्रेनमाथि गरेको आक्रमण र युक्रेनको सार्वभौम सत्ता, भौगोलिक अखण्डताबारे कुराकानी भएको जनाएका थिए ।

एन्टोनीले ट्विटरमा लेखेका छन्, ‘नेपालका प्रधानमन्त्री शेरबहादुर देउवासँग रुसले युक्रेनमा गरेको सैन्य आक्रमण र २ देशले युक्रेनको सार्वभौमसत्ता र भौगोलिक अखण्डतामा गरेको समर्थनबारे छलफल भएको छ । हामी आर्थिक विकास र क्षेत्रीय चुनौतीको सामना गर्न मिलेर काम काम गर्नेछौं ।’

यसअघि नेपालले संयुक्त राष्ट्रसंघको मानव अधिकार परिषद्मा युक्रेनको पक्षमा मतदान गरेको थियो । गत आइतवार नेपाली संसदले अमेरिकी सहयोगको एमसीसी सम्झौता समेत अनुमोदन गरेको छ ।