नेकपा (माओवादी केन्द्र)का नेता नारायणकाजी श्रेष्ठ 'प्रकाश'ले पार्टी अध्यक्ष पुष्पकमल दाहाल ‘प्रचण्ड’ र आफ्नो साढे २ दशक लामो सम्बन्ध गम्भीर मोडमा पुगेको बताएका छन् ।

राष्ट्रिय सभागृहमा शुक्रवार बसेको पार्टी केन्द्रीय समिति बैठकमा लिखित धारणा प्रस्तुत गर्दै श्रेष्ठले पार्टीभित्र दलाल पूँजीपतिहरूसँग साँठगाँठ गर्ने प्रवृत्ति मौलाएको आरोप पनि लगाए ।

‘पार्टीमा नोकरशाही, पूँजीपति तथा दलालहरूसँग साँठगाँठ गर्ने प्रवृत्ति बढेको छ,’ बैठकमा श्रेष्ठले भने, ‘नेतृत्व नै चरम व्यक्तिवादी बनेको छ ।’

नेता श्रेष्ठले अध्यक्षले नै आफूलाई पार्टी छाड्न भनेको गुनासो समेत गरेका छन् । प्रचण्ड र आफ्नो २०५३ देखिकै सम्बन्ध गम्भीर मोडमा पुगेको उनको भनाइ थियो ।

प्रचण्डले एमसीसीका सम्बन्धमा धारणा सार्वजनिक गर्न सोमवार आयोजित पत्रकार सम्मेलनमा ‘कसैलाई पार्टी छाड्न मन लागे नरोक्ने’ अभिव्यक्ति दिएका थिए ।

प्रचण्डको सो अभिव्यक्तिपछि श्रेष्ठ पक्षधर नेताहरू असन्तुष्ट छन् ।

एमसीसी अनुमोदनका सम्बन्धमा समेत फरक धारणा राख्दै आएको समूहको नेतृत्व गर्दै बैठकमा श्रेष्ठले लिखित धारणा पेश गरेका हुन् ।

बैठकमा अध्यक्ष प्रचण्डले भने व्याख्यात्मक घोषणासहित एमसीसी एमसीसी पारित गर्ने पार्टीको निर्णयलाई अनुमोदन गर्दै चुनावमा केन्द्रित हुन प्रस्ताव गरेका थिए ।

एमसीसी पारित भएपछि वर्तमान सत्ता गठबन्धन चुनावसम्मै जाने पक्का भएको उनको भनाइ थियो ।