नेकपा (एकीकृत समाजवादी)का अध्यक्ष माधवकुमार नेपालले एमालेको अवरोध नटुंगिएकाले अब  संसद् भंग गरेर चुनावमा जानुपर्ने बताएका छन् ।

प्रतिनिधि सभाबाट बाहिरिने क्रममा सञ्चारकर्मीलाई संक्षिप्त प्रतिक्रिया दिँदै नेता नेपालले केपी ओलीलाई अब सहन नसकिने अवस्थामा पुगेको बताएका हुन् ।

'केपी ओलीलाई कति सहने ? एमालेले हाउस चल्न नदिने, भत्ता पनि खाइरहने, हामीलाई पनि हैरान पार्ने, त्यसैले अब संसद् भंग गर्ने, संसद् पनि रहन्न, यो वितण्डा पनि रहन्न । अब सबै निर्वाचनमा जाऔं ।'

माधव नेपालसहितका १४ सांसदमाथिको कारवाही सभामुख अग्नि सापकोटाले सदर नगरेको विरोधमा एमालेले प्रतिनिधि सभामा निरन्तर अवरोध गर्दै आएको छ ।

आइतवारको बैठकमा पनि एमाले सांसदहरूले नाराबाजी जारी राखेका थिए ।

यद्यपि प्रधानन्यायाधीश चोलेन्द्र शमशेर जबराविरुद्ध दर्ता भएको महाभियोग प्रस्तावका सम्बन्धमा गठित महाभियोग सिफारिश समितिमा भने एमालेले आफ्ना प्रतिनिधि पठाएको छ ।

११ सदस्यीय समितिमा एमालेबाट विष्णु पौडेल, कृष्णभक्त पोखरेल, शिवमाया तुम्बाहाम्फे र लालबाबु पण्डित सदस्य छन् ।

समितिमा कांग्रेस र माओवादीबाट २/२ तथा एकीकृत समाजवादी, जसपा र लोसपाबाट १/१ सदस्य छन् ।