संघीय मामिला तथा सामान्य प्रशासन मन्त्रालयले १० जना सह-सचिवहरूको सरुवा गरेको छ ।

कर्मचारी प्रशासन महाशाखा प्रमुख रघुराम विष्टका अनुसार मन्त्रालयको २२ गतेको निर्णयअनुसार जेनेरल इन्जिनियरिङ समूहका ५ जना, वन समूहका २ जना र प्रशासन समूहका ३ जना सहसचिवहरूको सरुवा भएको हो । 

स्थानीय पूर्वाधार विकास आयोजना गण्डकी प्रदेशका कुमार थापालाई मन्त्रालयको अतिरिक्त समूहमा, अतिरिक्त समूहमा रहेका शंकर पण्डित र कृष्णकुमार मिश्रलाई क्रमशः स्थानीय पूर्वाधार विकास लुम्बिनी र मधेश प्रदेशमा सरुवा गरिएको छ ।

संघीय मामिला तथा सामान्य प्रशासन मन्त्रालयको अतिरिक्त समूहमा रहेका रामेश्वर मरहट्ठालाई गृह मन्त्रालय वा अन्तर्गत सरुवा गरिएको छ भने वन तथा वातावरण मन्त्रालयका दुर्गाबहादुर कार्कीलाई वन, वातावरण तथा भू–संरक्षण मन्त्रालय–लुम्बिनी प्रदेशमा सरुवा गरिएको छ ।

अतिरिक्त समूहका शम्भु कार्कीलाई राष्ट्रिय प्राकृतिक स्रोत तथा वित्त आयोगमा सरुवा गरिएको संघीय मामिला तथा सामान्य प्रशासन मन्त्रालयका सह-सचिव विष्टले बताए। 

भौतिक पूर्वाधार तथा यातायात मन्त्रालयका सहसचिव गणेशराज वस्तीलाई संघीय मामिला तथा सामान्य प्रशासन मन्त्रालयको अतिरिक्तमा सरुवा गरिएको छ  भने उनको ठाउँमा अतिरिक्तका प्रेमदत्त भट्टलाई पठाइएको छ ।

मन्त्रालयले वन तथा वातावरण मन्त्रालयका सहसचिव नन्दलाल रायलाई उद्योग, पर्यटन तथा वन मन्त्रालय–मधेश प्रदेशको सचिवमा पठाएको छ भने त्यहाँकी सचिव विन्दुकुमारी मिश्रलाई संघीय सरकारको वन तथा वातावरण मन्त्रालयमा तानिएको छ ।