राप्रपा नेपालका अध्यक्ष कमल थापाले विगतका तीता कुरा बिर्सने र त्रुटिलाई सच्याएर अघि बढ्ने बताएका छन् । 

मंगलवार जिल्ला अध्यक्षहरूसँगको भर्चुअल बैठकलाई सम्बोधन गर्दै आगामी दिनमा अझ सशक्त भएर अघि बढ्ने बताएका हुन् । 

उनले राप्रपा नेपाललाई कांग्रेस-कम्युनिस्टको विकल्पको रुपमा अघि बढाइने समेत बताए । 

राप्रपा नेपालसँग अत्यन्तै बलियो र जनभावनाको सम्मान गर्ने विचार भएको बताउँदै उनले आफू पार्टीलाई माथि उठाउन रातोदिन मिहिनेत गर्न तयार रहेको समेत बताए । 

यस्तै उनले धर्म परिवर्तनको डढेलोले सामाजिक सद्भाव खल्बलिनेतर्फ पनि चिन्ता व्यक्त गरे । 

'भ्रष्टाचार र बेरोजगारीको डरलाग्दो बढोत्तरीलाई रोक्नेतर्फ कसैले चासो दिएको छैन,' उनले आक्रोश व्यक्त गर्दै भने, 'आर्थिक क्रान्तिको विषय कसैको प्राथमिकतामा परेको छैन, राजनीतिक एजेन्डामा मात्र सबै अलमलिएका छन् ।'

बैठकमा पार्टीका महामन्त्रीत्रय सुशील श्रेष्ठ, भाष्कर भद्रा र राजाराम बर्तौलाले स्थानीय निर्वाचन तयारी र प्रशिक्षण, सचिवालय तथा संगठन सम्बन्धमा आफ्नो-आफ्नो प्रस्तुति दिएका थिए । 

बैठकमा ४५ जिल्ला कार्यसमितिका अध्यक्ष एवं केन्द्रीय पदाधिकारीहरूको सहभागिता थियो । बाँकी जिल्ला अध्यक्षहरूको बैठक चाँडै गरिने राप्रपा नेपालको सचिवालयले जनाएको छ ।