चिनियाँ विदेश मन्त्री वाङ यी तीन दिने नेपाल भ्रमणका लागि शुक्रवार काठमाडौं आइपुग्दैछन् ।

दक्षिण एसिया भ्रमणमा रहेका यी पाकिस्तान, अफगानिस्तान र भारत भ्रमण सकेर दिल्लीबाट सिधै काठमाडौं आउन लागेका हुन् ।

अमेरिकी सहयोग परियोजना एमसीसी पारित भएपछि चीनका तर्फबाट भएको उच्चस्तरीय भ्रमणलाई महत्त्वका साथ हेरिएको छ ।

चिनियाँ राष्ट्रपति सी चिनफिङसँग अत्यन्तै निकट मानिने यी चीनका स्टेट काउन्सिलर समेत हुन् ।

शुक्रवार दिउँसो ३ बजे त्रिभुवन अन्तर्राष्ट्रिय विमानस्थलमा अवतरण गर्ने यीलाई परराष्ट्र मन्त्री नारायण खड्काले स्वागत गर्ने कार्यक्रम छ ।

विमानस्थलबाट सिधै उनी होटल द्वारिकाज बत्तीसपुतली पुग्नेछन् ।

नेपालमा रहँदा उनले राष्ट्रपति विद्यादेवी भण्डारी, प्रधानमन्त्री शेरबहादुर देउवा, पूर्व प्रधानमन्त्रीद्वय केपी शर्मा ओली र पुष्पकमल दाहाल प्रचण्ड तथा समकक्षी नारायण खड्कासँग भेट्ने तय भएको छ ।

यस्तो छ चिनियाँ विदेशमन्त्रीको भ्रमण तालिका :​

– दिउँसो ३ बजे त्रिभुवन अन्तर्राष्ट्रिय विमानस्थलमा अवतरण, परराष्ट्रमन्त्री नारायण खड्काले स्वागत गर्ने 
– विमानस्थलबाट सिधै होटल द्वारिकाज जाने 
– शनिवार बिहान ६:३० बजे हाइकिङ, शिवपुरीमा 
– त्यसपछि परराष्ट्र मन्त्री खड्कासँग सिंहदरबारमा भेट तथा द्विपक्षीय सम्झौतामा हस्ताक्षर 
– बालुवाटार पुगेर प्रधानमन्त्रीसँग भेट 
– काठमाडौंबाटै पोखरा क्षेत्रीय अन्तर्राष्ट्रिय विमानस्थलको भर्चुअल उद्घाटन 
– आइतवार बिहान ९:३० बजे शीतल निवास पुगेर राष्ट्रपति विद्यादेवी भण्डारीसँग भेट 
– सोही दिन होटल मेरियटमा एमाले अध्यक्ष केपी शर्मा ओली र माओवादी केन्द्रका अध्यक्ष पुष्पकमल दाहाल प्रचण्डसँग छुट्टाछुट्टै भेट 
– आइतवार भेटघाट सकेर स्वदेश फिर्ती