नेपाली कांग्रेसकी नेतृ सुजाता कोइरालाले चुनावमा गठबन्धनसँग तालमेल गरेर जानुपर्ने बताएकी छन् । 

गठबन्धनकै कारण कांग्रेसले केन्द्रमा प्रधानमन्त्री र प्रदेशमा मुख्यमन्त्री पाएको कुरा बिर्सन नहुने उनले बताइन् । 

‘चुनावमा गठबन्धन बनाएर जाँदा राम्रो हुन्छ भन्ने मेरो धारणा छ । जुन ठाउँमा हामी बलियो छौं, त्यहाँ लड्ने । कमजोर ठाउँमा सहयोग गर्ने गरी जानुपर्छ,’ केन्द्रीय समितिको बैठकअघि आइतवार पार्टी कार्यालय सानेपामा पत्रकारहरूसँग कुरा गर्दै कोइरालाले भनिन्, ‘गठबन्धनका कारण हामीले प्रधानमन्त्री पाएको छौं, मुख्यमन्त्री पाएका छौं र माथिल्लो सदनमा जिताउन सफल भएका छौं । त्यसैले गठबन्धन छाड्नु हुँदैन, कुन मोडलमा जाने भन्ने भन्ने तालिका बनाऔं ।’ 

प्रधानमन्त्री एवं पार्टी सभापति शेरबहादुर देउवाले पनि चुनावी तालमेलको कुरा गरिरहेका छन् ।

कांग्रेस संस्थापक कोइराला परिवारकी सदस्यसमेत रहेकी सुजाताले नेपाली कांग्रेस भारतीय कांग्रेस आईजस्तो नबन्ने दाबी गरिन् । ‘नेपाली कांग्रेस कांग्रेस आईजस्तो बन्न सक्दैन, यस्तो टिप्पणी नगरौँ,’ उनले भनिन्, ‘नेपाली कांग्रेसको ठूलो इतिहास छ, हरेक समयमा जनताले साथ दिएका छन् ।’ 

यसअघि शुक्रवारको बैठकमा कांग्रेस लुम्बिनीका सभापति अमरसिंह पुनले गठबन्धन गर्दै जाँदा कार्यकर्ताले कांग्रेस बिर्सने र पार्टीको हालत कांग्रेस आईको जस्तो हुने टिप्पणी केन्द्रीय समिति बैठकमा गरेका थिए ।