कमल थापाको प्रश्न : १५ वर्षमा राजसंस्था पुनःस्थापना गर्न राजाको के भूमिका रह्यो ?

राप्रपा नेपालका अध्यक्ष कमल थापाले राजतन्त्र पुनःस्थापना गर्न राजाले खेलेको भूमिकामाथि प्रश्न गरेका छन् ।

राष्ट्रिय प्रजातन्त्र पार्टी (राप्रपा) अध्यक्ष राजेन्द्र लिङ्देनले राजसंस्था पुनःस्थापनाका लागि सक्रियता देखाएपछि त्यसमाथि प्रश्न गर्दै अध्यक्ष थापाले त्यसलाई ‘असम्भव एजेन्डा’ भनेका छन् ।

सामाजिक सञ्जाल ट्विटरमा लेख्दै अध्यक्ष थापाले युवाको भविष्यमाथि खेलवाड नगर्न आग्रह गरेका छन् ।

थापाले लेखेका छन्, ‘२०६३/६४ ताका ‘मरेको लाश नबोकौ दाइ’ भनेर सल्लाह दिने भाइहरू अहिले पार्टी कब्जा गरेर मलाई धुवाँधार गालीको वर्षा गरिरहेको देख्दा हाँसो लाग्छ । गालीगलौजको सट्टा निर्मल निवासलाई सोध्नोस् – गत १५ वर्षमा राजसंस्था पुनःस्थापना गर्न राजाको के भूमिका रह्यो ? पटक–पटक राप्रपा कमजोर पार्ने काम किन भयो ? असम्भव एजेण्डा बोकेर आफ्नो र युवाहरूको भविष्यमाथि खेलवाड गर्ने काम छाड्नोस् । मैले त छोडें । हेरिराख्नु होला, केही वर्षपछि भाइहरू पनि मेरै बाटोमा आउनुपर्छ । राजसंस्थाको माया त मलाई अहिले पनि लाग्छ तर के गर्नु ‘उनको’ व्यवहार र सोचाइ नै गलत भयो । त्यसैले गालीगलौजमा समय खेर नफाल्नोस् ।’