निर्वाचन आयोगले राजनीतिक दलहरूलाई मतदाता नामावली उपलब्ध गराउने भएको छ । 

निर्वाचन निर्देशिका २०७८ मा राजनीतिक दललाई मतदाता नामावली उपलब्ध गराउने व्यवस्था गरेअनुसार आयोगले राजनीतिक दलको आधिकारिक पत्र सहित दस्तुर बुझाएपछि मतदाता नामावली पाउन सकिने निर्वाचन आयोगका प्रवक्ता शालिग्राम शर्मा पौडेलले बताए । 

सम्बन्धित राजनीतिक दलको केन्द्रीय कार्यालयको पत्रसहित सात हजार रूपैयाँ तिरेपछि देशभरको मतदाता नामावली लिन सकिने पौडेलले बताए ।

कुनै एक प्रदेशको मात्रै मतदाता विवरण लिन चाहेका सम्बन्धित दलको पत्र सहित ५ हजार रूपैयाँ तिर्नुपर्ने, जिल्लाको लागि सम्बन्धित जिल्लाको राजनीतिक दलको पत्रसहित ३ हजार, पालिकाको लागि पत्रसहित १ हजार र वडा तहको मात्रै मतदाता विवरण प्राप्त गर्न ५०० रूपैयाँ दस्तुर तिर्नुपर्ने निर्वाचन आयोगले बताएको छ ।