सत्ता गठबन्धनमा आवद्ध ५ दलले रुपन्देहीको सिद्धार्थनगर नगरपालिकामा स्थानीय तह निर्वाचनमा तालमेल गरेर जाने घोषणा गरेका छन् ।

भैरहवामा बसेको गठबन्धनमा आवद्ध दलहरूको बैठकले चुनावी तालमेलको आवश्यकता ठहर गर्दै नगर र वडामा संयन्त्र गठन गरी वडा तहसम्म नै तालमेल गरेर जाने निर्णय गरेका छन् ।

नेपाली कांग्रेस नगर सभापति कोसिसबहादुर खड्काको सभापतित्वमा बसेको सत्ता साझेदार दलहरू नेकपा एकीकृत समाजवादी, नेकपा माओवादी केन्द्र, जनता समाजवादी पार्टी (जसपा) नेपाल र राष्ट्रिय जनमोर्चाको नगर स्तरीय संयुक्त बैठकले चुुनावी संयन्त्र निर्माण गरी छलफललाई थप अगाडि बढाउने निर्णय गरेको छ । 

बैठकपछि कांग्रेस नगर सभापति खड्का, नेकपा माओवादी केन्द्रका नगर इन्चार्ज फैज अहमद खाँन, नेकपा एकीकृत समाजवादीका नगर अध्यक्ष रामबहादुुर बस्नेत, जसपाका नगर अध्यक्ष अर्जुुन जयसवाल र राष्ट्रिय जनमोर्चाका नगर अध्यक्ष नेत्र आचार्यद्वारा जारी संयुुक्त विज्ञप्तिमा गठबन्धनमा आबद्ध दलहरूबीच गठबन्धनको मर्म र भावना अनुुरूप एकआपसमा सम्मान र हार्दिकताको विकास गर्दै लगेर स्थानीय तहको निर्वाचनमा संयुुक्त रूपमा सहभागी हुुने उल्लेख छ । 

सिद्धार्थनगर नगरपालिकाका सबै वडामा समेत तालमेल गर्ने निर्णय भएको कांग्रेस नगर सचिव अनिल केसीले जानकारी दिए ।