गुल्मीमा नेकपा एकीकृत समाजवादी र जनता समाजवादी पार्टी (जसपा) नेपाललाई बेवास्ता गरी चुनावी गठबन्धनमा स्थानीय तह बाँडफाँट गरिएको छ ।

१२ पालिका रहेको गुल्मीमा ८ पालिका नेपाली कांग्रेस र ४ पालिका नेकपा माओवादी केन्द्रले लिने तयारी छ ।

गुल्मीमा १० गाउँपालिका र २ नगरपालिका छन् । नेकपा माओवादी केन्द्र लुम्बिनी प्रदेशका अध्यक्ष सुदर्शन बरालले १२ पालिकामध्ये ८ वटा कांग्रेस र ४ वटा माओवादीले लिने गरी मोटामोटी रूपमा बाँडफाँट टुंगिएको लोकान्तरलाई बताए । 

गठबन्धनका २ दलले पालिका नेतृत्व पाउने भएनन् नि भन्ने प्रश्नमा बरालले लोकान्तरसँग भने, ‘होइन । प्रमुख मात्र कहाँ हो र ? उपप्रमुख/उपाध्यक्ष, वडा अध्यक्ष, जिल्ला समन्वय समिति लगायत पनि पदहरू छन् । त्यहाँ उहाँहरूलाई दिइन्छ नि ! गठबन्धनमा कसैलाई अप्ठ्यारो हुँदैन ।’ 

बरालले थपे, ‘बाँडफाँट गरिएकामध्ये मालिका गाउँपालिका माओवादी केन्द्रले लिने विषय टुंगो लागेको छ । अन्य पालिका बाँकी छ । जिल्लाका १२ वटै पालिका गठबन्धनका उम्मेदवार भारी मतका साथ जित्छन् ।’

माओवादीले चन्द्रकोट, रुरु र मदाने गाउँपालिका पनि मागेको छ । गुल्मीमा नेकपा एमाले बलियो छ । गुल्मीमा एमाले प्रभावशाली नेताहरू उपमहासचिव प्रदीप ज्ञवाली र सचिव गोकर्ण विष्ट छन् ।

शहरी विकास मन्त्री रामकुमारी झाँक्री पनि गुल्मीकै हुन् । 

कांग्रेस गुल्मीका सभापति खिलध्वज पन्थीले कांग्रेस र माओवादीले नेतृत्व लिने मोटामोटी टुंगो लागेको बताए । एकीकृत समाजवादीलाई सम्मानजनक स्थान दिइने उनले बताए ।

कुनै पनि पालिका अध्यक्ष/प्रमुख नेकपा एस र जसपालाई नदिएपछि असन्तुष्टि बढ्ने देखिएको छ । नेकपा एकीकृत समाजवादी गुल्मी अध्यक्ष नरेश भण्डारीले शक्ति सन्तुलनको हिसाबले आफूहरूलाई एउटा पालिकाको नेतृत्व दिनुपर्ने बताए ।

‘गठबन्धन भनेको लिन र छाड्न दुवै गर्न तयार हुनुपर्छ,’ उनले भने, ‘हाम्रो शक्तिलाई कमजोर ठान्न हुँदैन । अरु कुरा अन्तिम निर्णय आएपछि भनौंला ।’ जसपा र नेकपा एसलाई विभिन्न पालिकाका वडा दिने गरी छलफल भइरहेको पन्थीले संकेत गरे । 

गत निर्वाचनमा गुल्मीमा एमालेले रेसुंगा र मुसिकोट नगरपालिकासहित ७ वटा पालिकामा जीत हासिल गरेको थियो । कांग्रेसले ४ र माओवादी केन्द्रले एउटा पालिकामा मात्र जीत निकालेको थियो । 

जनता समाजवादी पार्टी रुपन्देहीका नेता पंकज राईले निषेधको गठबन्धन ठीक नहुने बताए । गुल्मीमा एमालेले एक्लै चुनावी तयारी थालेको छ ।