नेकपा एमालेले वैशाख ३० गते हुने निर्वाचनको लागि ३ महानगरपालिका र ३ उपमहानगरपालिकामा मात्रै उम्मेदवार सिफारिस गरेको छ ।

एमालेले उपमहानगरपालिकाको उम्मेदवार प्रदेश कमिटीबाट र महानगरपालिकाको उम्मेदवार केन्द्रीय कमिटीबाट टुंगो लगाउने विधि तय गरेको छ । त्यसका महानगर कमिटीले जिल्ला कमिटी हुँदै प्रदेश र केन्द्रीय कमिटीमा सम्भावित उम्मेदवारको नाम सिफारिस गर्नुपर्ने व्यवस्था छ । 

देशभरका ११ वटा उपमहानगरपालिका र ६ वटा महानगरपालिकामा उम्मेदवार हुन योग्य व्यक्तिको नाम जिल्ला कमिटीमा सिफारिस भइरहेका छन् । 

काठमाडौं, पोखरा र वीरगञ्जमा धेरै आकांक्षी हुँदा एमालेलाई उम्मेदवार चयन गर्न सकस परिरहेको एमालेका स्थानीय नेताहरू बताउँछन् । 

काठमाडौंमा छलफल हुँदै

राजधानी शहर रहेको काठमाडौं महानगरपालिकामा भने मंगलवारसम्म मात्रै मेयरको सम्भावित उम्मेदवार टुंगो लाग्ने भएको छ ।

काठमाडौंमा वडा तहको उम्मेदवार छनौटको लागि छलफल शुरू भएको र मंगलवारसम्ममा मेयरको दाबेदार सिफारिस भएर आउने सम्भावना रहेको एमाले काठमाडौं जिल्ला कमिटीका अध्यक्ष दीपक निरौलाले बताए । 

काठमाडौं महानगरमा अहिलेका मेयर विद्यासुन्दर शाक्य फेरि दोहोरिन चाहेका छन् । त्यसबाहेक, बागमती प्रदेशका सांसद केशव स्थापित पनि मेयरको टिकटको लबिङमा छन् । बागमती प्रदेशको मन्त्री भइसकेका स्थापित २०५४ मा काठमाडौं महानगरको मेयर भइसकेका व्यक्ति हुन् । उनी फेरि काठमाडौंको मेयर हुन खोजेका छन् । 

राजधानी शहरको मेयर हुँदा राष्ट्रिय र अन्तर्राष्ट्रिय प्रतिष्ठा हुने भएकाले पनि काठमाडौंको मेयरमा केन्द्रीय नेताहरूको ध्यान जाने गरेको छ । 

यससँगै, एमालेका केन्द्रीय सदस्य एवं बागमती प्रदेशका सांसद कृष्ण राईको नाम पनि सम्भावित मेयरको उम्मेदवारको रुपमा चर्चामा छ । उनी एमाले काठमाडौं जिल्ला कमिटीका पूर्व अध्यक्ष पनि हुन् । त्यसबाहेक, काठमाडौं जिल्ला कमिटीका अध्यक्ष दीपक निरौलाको नाम पनि काठमाडौंको मेयरको उम्मेदवारको रुपमा चर्चामा रहेको छ ।

ललितपुरमा फेरि व्यञ्जनकार

एमालेले ललितपुर महानगरपालिकामा फेरि हरिकृष्ण व्यञ्जनकारलाई मेयरको उम्मेदवारमा अघि सार्ने भएको छ । २०७४ को निर्वाचनमा उनी कांग्रेसका उम्मेदवार चिरिबाबु महर्जनसँग ३२९ मतान्तरले पराजित भएका थिए । 

एमालेको ललितपुर महानगर कमिटीले व्यञ्जनकारको नाम सर्वसम्मतरूपमा जिल्ला कमिटीमा सिफारिस गरेको हो । उनीसँग उपमेयरमा भने आस्था शाक्य र सरस्वती खड्काको नाम सिफारिस भएको छ । शाक्य ललितपुर महानगर कमिटी अध्यक्ष पनि हुन् । 

भरतपुरमा सुवेदी सर्वसम्मत

अघिल्लो चुनावमा सर्वाधिक चर्चामा रहेको चितवनको भरतपुर महानगरपालिकाको मेयरको उम्मेदवारमा एमालेले सर्वसम्मत रुपमा नाम सिफारिस गरेको छ । भरतपुरको मेयरको उम्मेदवारको लागि विजय सुवेदीको नाम सिफारिस भएको हो । 

उनी अहिले एमालेको बागमती प्रदेश कमिटीका सचिव छन् । सुवेदीले तीन कार्यकाल एमालेको चितवन जिल्ला कमिटी अध्यक्ष भएर काम गरेका थिए । बागमती प्रदेश सभा सदस्य समेत रहेका सुवेदीले अष्टलक्ष्मी शाक्य बागमती प्रदेशको मुख्यमन्त्री हुँदा सामाजिक विकास मन्त्री भएर काम गरेका थिए ।

अघिल्लो पटक भरतपुरमा एमालेले देवी ज्ञवालीलाई उम्मेदवार बनाएको थियो । त्यसबेला उनी कांग्रेस र माओवादीको साझा उम्मेदवार रेणु दाहालसँग पराजित भएका थिए । यसपटक एमालेले चितवनमा विगतको पीडा बिर्साउने तयारीका साथ सर्वसम्मतरूपमा मेयरको उम्मेदवार सिफारिस गरेको छ ।  

विराटनगरमा केन्द्रीय सदस्यदेखि महानगर अध्यक्षसम्म

एमालेको विराटनगर महानगर कमिटीले ५ जनाको नाम मेयरको उम्मेदवारमा सिफारिस गर्ने निर्णय गरेको छ । एमाले केन्द्रीय सदस्य रामलाल साह, प्रदेश कमिटी सदस्यद्वय कृष्ण बस्नेत (पर्शुराम) र महेश भट्टराई, जिल्ला कमिटी उपाध्यक्ष बाबुराम कार्की र महानगर अध्यक्ष सागर थापाको नाम सम्भावित मेयरको उम्मेदवारको लागि सिफारिस भएको छ ।

त्यसैगरी, महानगर कमिटीले उप-प्रमुखमा प्रदेश कमिटी सदस्य विमला घिमिरे दाहाल, जिल्ला सदस्य अन्जु उपाध्याय र महानगर कमिटी उपाध्यक्ष शिल्पा कार्कीको नाम सिफारिस गरेको महानगर अध्यक्ष सागर थापाले बताए ।

पोखरामा मंगलवार मात्रै उम्मेदवार सिफारिस हुने

एमालेको पोखरा महानगर कमिटीले भने आगामी मंगलवार मात्रै मेयर र उपमेयरको सम्भावित उम्मेदवारको नाम सिफारिस गर्ने भएको छ । 

पोखरामा एमालेबाट अहिलेका मेयर मानबहादुर जिसी नै मेयरमा दोहोरिन चाहेका छन् । एमालेको कास्की जिल्ला कमिटी अध्यक्ष मनबहादुर गुरूङ अहिले वडा अध्यक्ष र सदस्यको मात्रै उम्मेदवार सिफारिस भएर आएको बताए । महानगरपालिकाको भने सोमवार मात्रै सिफारिस हुने उनले जानकारी दिए । 

वीरगञ्जमा सरावगीको सम्भावना

एमालेको वीरगञ्ज महानगर कमिटीले सोमवार मात्रै उम्मेदवार सिफारिस गरेर नाम सार्वजनिक गर्ने तयारी गरेको छ ।

महानगर कमिटीको बैठक सोमवार बसेर उम्मेदवार सिफारिस गर्ने तयारी रहेको कमिटीका उपाध्यक्ष महेश दासले बताए । वीरगञ्जमा भर्खरै एमाले प्रवेश गरेका विजय सरावगी मेयरका प्रमुख दाबेदार हुन् । वीरगञ्जमा एमालेले लोकतान्त्रिक समाजवादी पार्टीसँग तालमेलको लागि छलफल गरिरहेको छ । 

३ उपमहानगरमा मात्रै उम्मेदवार सिफारिस

देशभरमा रहेका ११ वटा उपमहानगरमध्ये आइतवार साँझसम्म जनकपुरधाम, धरान र इटहरी उपमहानगरपालिकाको मात्रै उम्मेदवार सिफारिस भएको छ । 

एमालेको उपमहानगर कमिटीले सम्भावित उम्मेदवारको नाम जिल्ला कमिटीमा सिफारिस गरेको हो । ​

जनकपुरधाममा व्यापारी उम्मेदवार

नेपाल एमालेले जनकपुरधाम उपमहानगरपालिकामा व्यापारिक पृष्ठभूमिका व्यक्तिलाई उम्मेदवार सिफारिस गरेको छ । शिवशंकर साह एमालेको मधेश प्रदेश कमिटीका सदस्य हुन् । उनी यसअघि जनकपुर उद्योग वाणिज्य संघको अध्यक्ष थिए भने नेपाल उद्योग वाणिज्य महासंघ मधेश प्रदेशको अध्यक्ष भएका थिए । एमाले निकट नेपाल राष्ट्रिय उद्योग व्यवसायी महासंघको राष्ट्रिय उपाध्यक्ष छन् । 

उनी मधेश आन्दोलनमा सहभागी हुँदै राष्ट्रिय जनता पार्टी नेपालमा आवद्ध थिए । त्यसबेला पनि उनी जनकपुरधाम उपमहानरपालिकाको मेयरका दावेदार थिए । उक्त पार्टीमा टिकट नपाएपछि उनी चार वर्ष अघि एमाले प्रवेश गरेका थिए । उनी एमालेमा स्थायी कमिटी सदस्य रघुवीर महासेठ निकट मानिन्छन् ।

धरानमा ११ जनाको नाम सिफारिस

धरान उपमहानगरपालिकामा एमालेले मेयरका आकांक्षी सबैको नाम जिल्ला कमिटीमा सिफारिस गरेको छ । त्यसैगरी, उपमेयरमा ६ जनाको नाम सिफारिस गरिएको हो । 

एमालेको धरान उमहानगर कमिटीले मेयरको उम्मेदवारको पहिलो नम्बरमा हाल उपमेयर रहेकी मञ्जु भण्डारीको नाम सिफारिस गरेको छ भने पूर्वमेयर मनोजकुमार मेन्याङ्बोको नाम दोस्रोमा छ । 

यस्तै विजय राई, प्रकाश राई, मोतिराज सुनुवार, दोर्पध्वज राई, किशोरकुमार कार्की, मीन सुब्बा, नारायण सुवेदी, राजमणि निरौला र तीर्थ मास्केको नाम मेयरको उम्मेदवारका लागि सिफारिस भएको एमालेको धरान जिल्ला कमिटी अध्यक्ष हर्कजंग एभेङले जानकारी दिए । 

उनका अनुसार एक केन्द्रीय सदस्य, सात जना प्रदेश समिति सदस्य, तीन जिल्ला सदस्य तथा एक जना पूर्वजिल्ला सदस्यको नाम मेयर उम्मेदवारका लागि सिफारिस भएको हो । 

उपमेयरमा सुशीला पहाडी, लहरु जिमी, पदम इस्वो लिम्बू, इन्द्रकला राई, सविता चाम्लिङ र लीला राईको नाम सिफारिस गरिएको छ ।

१० बुँदे सहमति पक्षधरको राम्रो प्रभाव रहेको मानिने धरानमा ओलीनिकट मञ्जु भण्डारी र उपमेयरमा १० बुँदेतर्फका पदम इस्बो लिम्बुलाई उपमेयर दिने सम्भावना रहेको एमालेका नेताहरू बताउँछन् । 

धरान उप-महानगरपालिकामा २०७४ को निर्वाचनमा नेकपा एमालेबाट प्रमुखमा तारा सुब्बा र उपप्रमुखमा मन्जु भण्डारी विजयी भएका थिए । 

प्रमुखमा जितेका सुब्बाले त्यसबेला २० हजार ९७५ मत ल्याएका थिए । उनका निकटतम प्रतिस्पर्धी बनेका कांग्रेसका तिलक राईले १६ हजार १०२ र तेस्रो स्थानमा माओवादी केन्द्रका अइन्द्रविक्रम बेघाले ११ हजार १८० मत ल्याएका थिए ।

प्रमुख सुब्बाको निधन भएपछि खाली भएको उपनिर्वाचनमा भने कांग्रेसका तिलक राईले तत्कालीन नेकपाका प्रकाश राईलाई हराएका थिए । राईलाई झण्डै ३ हजार मतले पराजित गरेका थिए । 

इटहरीमा द्वारिकासहित ६ जना सिफारिस

इटहरी उपमहानगरपालिकामा एमालेले बहालवाला मेयर र उपमेयरसहित सम्भावित उम्मेदवारको नाम सिफारिस गरेको छ । आइतवार बसेको एमाले नगरकमिटी सचिवालय बैठकले ६ जनाको नाम सिफारिस गरेको हो । 

मेयरको उम्मेदवारको लागि द्वारिकालाल चौधरी, उपमेयर लक्ष्मी गौतम एमाले उपमहानगर कमिटीका अध्यक्ष यमकुमार सुब्बा, इटहरी खानेपानी समितिका अध्यक्ष रामप्रसाद चौलागाईं, इटहरी उपमहानगरका कमिटीका पूर्व अध्यक्ष रेवतिप्रसाद घिमिरे र एमाले सुनसरी जिल्ला कमिटी सदस्य बन्नुलाल चौधरीको नाम सिफारिस भएको छ । 

त्यसैगरी, एमाले इटहरी कमिटीले उपमेयरमा भने ९ जनाको नाम सिफारिस गरेको छ । जसमा अम्बिका चौधरी, बिष्णु शर्मा (नेपाल), अमला श्रेष्ठ, अनिता शर्मा, संगीता  चौधरी, रामचरण चौधरी, गायत्री चौधरी, रुक्मिणी कोइराला र मिथिला पोख्रेलको नाम सिफारिस भएको छ । 

रुपन्देहीको बुटवल उपमहानगर कमिटीले भने सोमवार मात्रै सम्भावित उम्मेदवारको नाम सार्वजनिक गर्ने बताएको छ । 

त्यसबाहेक, निजगढ, जितपुर सिमरा, हेटौंडा, तुलसीपुर, घोराही, नेपालगञ्ज र धनगढी उपमहानगरपालिकाको उम्मेदवार सिफारिस भइसकेको छैन । आगामी मंगलवारसम्म यी उपमहानगरपालिकाको कमिटीले जिल्ला कमिटीमा सम्भावित उम्मेदवारको नाम सिफारिस गर्ने तयारी गरेका छन् ।