नेकपा (एकीकृत समाजवादी)का सम्मानित नेता झलनाथ खनालले महानगर र उपमहानगरको उम्मेदवार केन्द्रले टुंग्याउने गठबन्धनबीच सहमति भएको बताएका छन् । 

महानगर तथा उपमहानगरमा कांग्रेसले उम्मेदवारहरूको छनोट गरिरहेका बेला नेता खनालले सत्तारुढ गठबन्धनले माथिबाटै उम्मेदवारको टुंगो लगाउने बताएका हुन् ।

विराटनगर महानगरपालिकामा कांग्रेसले आजै उम्मेदवारको सिफारिस गर्ने भएको छ । कांग्रेसले विराटनगरमा गठबन्धन नगर्ने निर्णयनै गरिसकेको छ ।

मंगलवार विराटनगर विमानस्थलमा सञ्चारकर्मीहरूसँग कुराकानी गर्दै नेता खनालले एक महानगर र एक उपमहानगरमा नेकपा (एस)को दाबी रहनेसमेत बताए । 

अन्य पालिकाहरूमा भने केन्द्रको हस्तक्षेप नरहने उनको भनाइ छ । उनले तोकिएकै समयमा चुनाव हुने समेत बताए ।