नवौं राष्ट्रिय खेलकुद प्रतियोगिता आगामी जेठको अन्तिम साता हुने भएको छ । 

बुधवार बसेको मन्त्रिपरिषदको बैठकले जेठ २२ देखि २८ सम्म प्रतियोगिता सञ्चालन गर्ने निर्णय गरेको हो । 

युवा तथा खेलकुद मन्त्रालयको प्रस्तावमा मन्त्रिपरिषदको बैठकले प्रतियोगिताको मिति तय गरेको हो ।  

गण्डकी प्रदेशको राजधानी तथा पर्यटकीय नगरी पोखरामा आयोजना हुने प्रतियोगिताको मिति तय भएसँगै आवश्यक तयारी थाल्न युवा तथा खेलकुद मन्त्री महेश्वर गहतराज (अथक) ले निर्देशनसमेत दिएका छन् । 

प्रत्येक दुई वर्षमा आयोजना गर्ने लक्ष्यसहित शुरु गरिएको राष्ट्रिय खेलकुद प्रतियोगिताको नवौं संस्करण २०७७ मा आयोजना गर्नुपर्ने थियो । तर, विश्वव्यापी रुपमा फैलिएको कोभिड संक्रमणका कारण दुई वर्षदेखि सञ्चालन हुन नसकेको प्रतियोगिता आगामी जेठमा सञ्चालन हुन लागेको हो ।