नेकपा एमाले र राप्रपा नेपालबीच चुनावी तालमेल गर्ने सहमति भएपछि ललितपुर महानगरपालिका र गोदावरी नगरपालिकामा राप्रपा नेपालले उपमेयर माग गरेको छ । 

ललितपुरस्थित नेकपा एमालेको पार्टी कार्यालयमा आइतवार बसेको दुवै पार्टीका प्रतिनिधिहरूबीचको बैठकमा राप्रपा नेपालले यी दुई ठाउँमा उपमेयरसहित केही वडाध्यक्षहरू आफूले पाउनुपर्ने माग गरेको हो । 

‘हामीले नगरका वडाहरूमा पनि दाबी गरेका छौं,’ बैठकपछि राप्रपा नेपाल ललितपुरका अध्यक्ष राजेन्द्र महर्जनले भने, ‘हामी आपसमा बसेर सैहार्दपूर्ण रुपमा सबै कुरा टुंगो लगाउँछौँ ।’

उनले आफूहरूको दाबी सांगठानिक हैसियत र जनमतअनुसारको हुने बताए । 

बैठकमा एमाले ललितपुर अध्यक्ष पुरुषोत्तम दाहाल, प्रदेश सदस्य बाबुकाजी प्रधान र राप्रपा नेपालबाट जिल्ला अध्यक्ष राजेन्द्र महर्जन, जिल्ला उपाध्यक्ष गोविन्द खड्का र जिल्ला सचिव अमर मालिको सहभागिता थियो ।