अर्थ मन्त्रालयले व्यापार घाटा बढेको, विदेशी मुद्राको सञ्चिति घटेको र अर्थतन्त्रमा हरेक महिना दबाब बढ्दै गएको भन्दै आयातलाई निरुत्साहन गर्ने निष्कर्ष निकालेको छ । 

अर्थ मन्त्रालयले नेपाल राष्ट्र बैंक, भन्सार विभाग, आन्तरिक राजस्व विभागसहितका निकायसँग आयात घटाउने विषयमा आइतवार गरेको छलफलबाट आयात निरुत्साहन गर्ने निष्कर्ष निकालेको हो । 

अर्थ मन्त्रालयका अनुसार विलासितासहितका वस्तुहरूमा प्रतिबन्ध लगाउने भन्ने विषयमा छलफल भएको भए पनि नेपाल विश्व व्यापार संगठनको सदस्य भएकोले अन्तर्राष्ट्रिय व्यापारको सिद्धान्त पालना गर्नुपर्ने हुँदा निरुत्साहन मात्रै गर्ने निष्कर्ष निकालिएको छ । 

अर्थ मन्त्रालयका अनुसार आयातमा निरुत्साहन गर्न कर बढाउने वा अन्य माध्यमको प्रयोग गर्ने भन्ने विषयमा भने निर्णय हुन बाँकी छ । 

आयात बढेर अर्थतन्त्रमा चाप परेपछि आयात निरुत्साहन गर्ने विषयमा अर्थ मन्त्रालयले यसअघि चार पटक आवश्यक छलफल गरिसकेको छ । अर्थ मन्त्रालयका अनुसार आयात प्रतिबन्ध लगाउन सकिने वस्तुहरू र निरुत्साहन गर्न सकिने वस्तुहरूको सूची राखेरै छलफल भएको हो ।

छलफलपछि बैंकले एलसी नखोल्ने र नेपालमा आयात भए पनि थप भ्यालु एड कम भएका वस्तुको आयात नगर्ने निष्कर्ष पनि निकालिएको छ । 

अर्थ मन्त्री जनार्दन शर्माले बैठकमा पाम आयलको आयातको तुलनामा निर्यातमा भएको भ्यालु एड कम देखिएको भन्दै उक्त वस्तुको आयात निरुत्साहन गर्नुपर्ने बताए । 

व्यक्तिगत प्रयोजनका सवारीसाधनसहित अत्यावश्यकबाहेकका वस्तुको एलसी नखोल्ने र आगामी बजेटपछि आयात निरुत्साहन गर्न कर थप गर्ने निष्कर्षमा अर्थ मन्त्रालय पुगेको छ ।