सत्तारुढ ५ दलीय गठबन्धनको बैठक भइरहेको बेलामा अमेरिकी राजदूत बालुवाटार प्रवेश गरेको विषय ‘स्वाभाविक’ भएको प्रतिक्रिया सरकारका प्रवक्ता ज्ञानेन्द्रबहादुर कार्कीले दिएका छन् । 

सोमवार गठबन्धनको बैठक भइरहेको बेलामा नेपालका लागि अमेरिकी राजदूत रेण्डी बेरी प्रधानमन्त्री निवास बालुवाटार पुगेका थिए । 

मंगलवारको गठबन्धन बैठकबाट बाहिरिएका सञ्चार तथा सूचना प्रविधि मन्त्री एवं सरकारका प्रवक्ता ज्ञानेन्द्रबहादुर कार्कीले अमेरिकी राजदूत प्रधानमन्त्री निवास आउनु स्वाभाविक भएको बताए । 

‘यो प्रधानमन्त्री निवास हो । यहाँ विभिन्न भेटवार्ता भइरहेका हुन्छन् । राजदूत मात्रै होइन । अरुसँग पनि भेटवार्ता भएको हुन्छ । प्रधानमन्त्री निवासमा राजदूत आउनु स्वाभाविक हो । यसलाई स्वाभाविक रूपमा लिनुपर्छ,’ कार्कीले भने ।

५ दलीय गठबन्धनको बैठक जारी रहेको र महानगर तथा उपमहानगरमा भागबण्डाबारे सत्तारुढ गठबन्धनको बैठक सहमतिउन्मुख रहेको उनले बताए । 

उनले भने, ‘हामीले समग्र ६ महानगरपालिका र ११ उपमहानगरपालिकाको विषयमा छलफल गरेका छौं । हरेक कोणबाट विचार आएका छन्, सकारात्मक निर्णयमा पुग्ने क्रममा छौं । तपाईंहरूलाई सुखद समाचार सुनाउने छु ।’