हिसाबकिताब माग्ने शेयरधनीलाई खुकुरी देखाएर तर्साउने गरेका एक क्रसर सञ्चालकलाई प्रहरीले पक्राउ गरेको छ ।

काभ्रेको तिमाल गाउँपालिकाका ज्ञानध्वज तामाङलाई भक्तपुर प्रहरी परिसरले पक्राउ गरी ज्यान मार्ने उद्योगमा अनुसन्धान अगाडि बढाएको हो ।

खुकुरी देखाएर शेयरधनीलाई धम्क्याउने गरेको जाहेरी परेपछि अनुसन्धानका लागि पक्राउ गरिएको भक्तपुर परिसरका प्रवक्ता डीएसपी राजु पाण्डेले बताए ।

‘ज्यान मार्ने उद्योगमा जाहेरी परेपछि पक्राउ गरेका हौं,’ प्रवक्ता पाण्डेले लोकान्तरसँग भने, ‘अहिले अनुसन्धान भइरहेको छ ।’

स्रोतका अनुसार ज्ञानध्वजले अन्य केही व्यक्तिसँग मिलेर काभ्रेमा ‘रिञ्जिङ दोर्जे’ नामक क्रसर उद्योग सञ्चालन गर्दै आएका थिए ।

उक्त क्रसरको अध्यक्ष ज्ञानध्वजकी पत्नी शान्ति लामा छिन् । त्यो कम्पनीमा उनको २० प्रतिशत शेयर छ । हिसाबकिताब ज्ञानध्वजले नै हेर्ने गरेको प्रहरी अनुसन्धानमा खुलेको छ ।

पाँच वर्षदेखिको हिसाबकिताब माग्न गएका शेयरधनीलाई उनले खुकुरी देखाएर तर्साउने गरेको पाइएको छ ।

लोकान्तरलाई प्राप्त भिडियोमा एकजना महिलाले हिसाब माग्दा उनले टेबलमुनिबाट खुकुरी झिकेको देख्न सकिन्छ ।

महिलालाई त्यहाँ भएका अन्य व्यक्तिले जोगाएका थिए । उनले ती महिलालाई ढोकासम्मै पच्छ्याएका थिए ।

हिसाब माग्न जाँदा उनले आफू पूर्व लडाकु र माओवादी अध्यक्ष प्रचण्डको पूर्व बडीगार्ड भएको भन्दै धम्क्याउने गरेको एक पीडितले बताए ।

स्रोतका अनुसार उनीसँग लामो बोरको लाइसेन्स प्राप्त बन्दुक छ भने अवैध पेस्तोल पनि देखाउने गरेका छन् । 

उनलाई २०७१ सालमा ३५ किलो सुन लुटपाटको अभियोगमा तत्कालीन महानगरीय अपराध महाशाखाले पक्राउ गरेको थियो ।

३५ किलो सुन लुटपाट र व्यक्ति अपहरणमा संलग्न भएको आरोपमा पक्राउ परेका उनलाई राजनीतिक संरक्षणमा छुटाइएको स्रोतको दाबी छ ।

त्यतिबेला उनी जम्मा एक रात हिरासतमा बसेर छुटेका थिए ।

हेर्नुहोस्, भिडियो :