नेपाली कांग्रेसले धनगढी उपमहानगरपालिकाको मेयरको उम्मेदवार पुनः नृपबहादुर वडलाई बनाउने भएको छ ।

सत्तारुढ गठबन्धनको भागबण्डामा धनगढीको मेयर कांग्रेसको भागमा परेसँगै पार्टीले वडलाई उम्मेदवार बनाउने टुंगो लगाएको हो । वड हालका मेयर समेत हुन् ।

कांग्रेसबाट मेयरका लागि धनगढीका कांग्रेस नेता कृष्ण महराले पनि आकांक्षा व्यक्त गरेका थिए तर उनलाई प्रदेशसभा सदस्यका लागि टिकट दिने सहमति भएको मेयर वडले बताए । 

उनले, ‘पार्टीले पुनः मलाई अर्को कार्यकालका लागि धनगढी उपमहानगरपालिकाको मेयरका लागि फाइनल गरेको हो । अहिले म काठमाडौंमा छु, आजै धनगढी पुगेर राजीनामा पनि दिन्छु ।’

कांग्रेसका केन्द्रीय सदस्य समेत रहेका वड २०७४ सालको स्थानीय तहको निर्वाचनमा धनगढीको मेयरमा निर्वाचित भएका थिए । उनले स्वतन्त्र उम्मेदवार गोपाल हमाललाई पराजित गरेका थिए ।

वैशाख ३० गते हुने निर्वाचनमा पनि स्वतन्त्रबाट उम्मेदवारी घोषणा गरेका हमाल र वडबीच कडा प्रतिस्पर्धा हुने देखिएको छ ।