प्रदेश १ को एक मात्र महानगर हो, विराटनगर । विराटनगरलाई पनि वैशाख ३० गते हुने स्थानीय तह निर्वाचनले छपक्कै छोपेको छ । 

नछोपोस् पनि किन ? कांग्रेस र एमालेले आफ्नो प्रतिष्ठाको विषय जो बनाएका छन् । 

कांग्रेस नेता शेखर कोइरालाको क्षेत्रसमेत भएकाले कांग्रेसलाई त्यहाँ हरहालमा आफ्नो वर्चस्व कायम गर्नुछ भने एमालेले गठबन्धनलाई ढालेर आफ्नो नेतृत्व कायम गर्नुछ । 

मुख्य प्रतिस्पर्धा नै कांग्रेस र एमालेको हुने देखिएको छ । 

विराटनगरमा सत्तारुढ गठबन्धनबाट मेयरमा नेपाली कांग्रेसका नागेश कोइराला र उपमेयरमा जसपा नेपालका अमरेन्द्र यादवले उम्मेदवारी दर्ता गराएका छन् । 

विराटनगर नगरपालिकामा एमालेबाट मेयरमा सागर थापा र उपमेयरमा शिल्पा निरला कार्कीले उम्मेदवारी दिएकी छन् । 

आगामी स्थानीय तहको निर्वाचनमा महानगरपालिकाको मेयरमा ठूला पार्टीबीच रोचक भिडन्त हुने भएको छ । 

जसपा परित्याग गरी स्वतन्त्रबाट उम्मेदवार दिएका उमेश यादवतिर पनि महानगरवासीको ध्यान तानिएको छ । गठबन्धन र एमालेलाई पनि केही असर पर्ने आकलन पनि गरिएको छ । 

राप्रपाबाट पूर्व मेयर समेत रहेका प्रल्हाद साहको उम्मेदवारीले पनि विराटनगरको राजनीतिमा केही प्रभाव पार्ने देखिन्छ । 

निर्वाचनमा होमिएका उम्मेदवारहरू यतिबेला आफ्नो भावी योजना सार्वजनिक गर्न व्यस्त छ । मतदातासँग पुगेर आफ्नो पक्षमा माहोल बनाउन विभिन्न योजनाहरू अगाडि बढाएका छन् । 

गठबन्धनको तर्फबाट विराटनगरको मेयरमा उठेका कोइरालाले आफ्नो मुख्य एजेन्डा करको दायरा बढाएर दर घटाउने भएको बताएका छन् । 

विराटनगरवासीको गुनासो जहिल्यै पनि कर बढी भयो भन्ने भएकाले करको दायरा बढाएर अहिले लिइरहेको करको दर घटाउने उनको भनाइ छ । शिक्षा, स्वास्थ्य र सरसफाइलाई ध्यानमा राखेर आफूले काम गर्नेसमेत उनले बताए । 

विराटनगरलाई मेडिकल हब बनाउने उनको भनाइ छ । विराटनगरवासीले चाहेको महानगर बनाउने उनले अठोटसमेत गरेका छन् । 

जसपाबाट उपप्रमुखमा उम्मेदवारी दिएका यादवले आफू निर्वाचित भए जनताको मन छुने गरी काम गर्ने बताए । जसपा केन्द्रीय अध्यक्ष उपेन्द्र यादवका छोरा नभएर राजनीतिक योगदानको आधारमा टिकट पाएको उनले दाबी गरे । बालबालिकाका लागि विभिन्न कार्यक्रम र बेरोजगार युवाहरूको लागि क्षमताको आधारमा कार्यक्रम ल्याउनेसमेत उनको भनाइ छ । उनले विराटनगरलाई सफा, सुन्दर र सुरक्षित शहर बनाउने प्रतिबद्धता व्यक्त गरे ।

नेकपा एमालेबाट विराटनगर महानगरपालिको मेयर उम्मेदवार सागर थापाले डुबानमुक्त विराटनगर बनाउने बताएका छन् । उनले विराटनगरको दक्षिणी क्षेत्रमा बर्सेनि हुने डुबानको समस्या समाधान गर्ने, भूमिहीन सुकुम्बासीलाई जग्गाको व्यवस्थापन गर्ने प्रमुख एजेन्डा भएको उनले बताए । 

‘समृद्ध महानगर बनाउने संकल्प बोकेर उम्मेदवारी दिएका हौँ,’ उनले भने, ‘अहिलेको गठबन्धन विकासविरोधी गठबन्धन भएकाले यसको कुनै तुक छैन ।’ जित सुनिश्चित भएको समेत उनले दाबी गरे । 

उपमेयरमा उम्मेदवारी दिएकी कार्कीले आफूले जितेको खण्डमा उपमेयरको काम कर्तव्यलाई ध्यानमा राखेर काम गर्ने बताइन् । आफूले काम गर्दा सकारात्मक सोचका साथ काम गर्ने र महानगरपालिकाको करको दर घटाएर दायरा बढाउँदै लैजाने बताइन् ।