नेपाली काँग्रेसका वरिष्ठ नेता रामचन्द्र पौडेलले नेकपा माओवादी काँग्रेसको प्रतिस्पर्धी नभएको बताएका छन् । 

बिहीवार चितवनको भरतपुरमा आयोजित चुनावी सभामा बोल्दै नेता पौडेलले यस्तो बताएका हुन् । उनले काँग्रेसको प्रतिस्पर्धी एमाले भएको बताए । उनले काँग्रेसबाट भरतपुरमा मेयरमा बागी उम्मेदवार रहेका जगन्नाथ पौडेलले आफ्नो तर्क सुन्न नचाहेको र इमोसनमा, भावावेशमा, एउटा उत्तेजनामा उम्मेदवारी दिइरहेको आरोप लगाए । 

वरिष्ठ नेता पौडेलले काँग्रेसको अहिलेको प्रतिष्पर्धा एमालेसँग भएको र ओली प्रवृत्तिसँग आफ्नो असहमति र द्वन्द्व रहेको दाबी गरे । वरिष्ठ नेता पौडेलले आफूलाई केही नेता, कार्यकर्ताहरूले काँग्रेसका सभापति एवं प्रधानमन्त्री शेरबहादुर देउवासँग मिल्न गएको भन्ने आरोप लगाइरहे पनि त्यो यथार्थ नभएको जिकिर गरे । उनले गठबन्धनको आह्वान प्रधानमन्त्री देउवाले भन्दा पहिला आफूले गरेको उद्घोष गरे ।