चिकित्सक कुटेको आरोपमा रास्वपाका क्षेत्रीय सभापतिसहित दुई जना पक्राउ

मोरङको उर्लाबारी नगरपालिका—३ स्थित मुगलबारेमा रहेको मदन भण्डारी अस्पताल तथा ट्रमा सेन्टरमा कार्यरत चिकित्सकमाथि कुटपिट गरेको आरोपमा  प्रहरीले राष्ट्रिय स्वतन्त्र पार्टी (रास्वपा) का क्षेत्रीय सभापति सहित २ जनालाई पक्राउ गरेको छ ।

मोरङ क्षेत्र नं. १ का क्षेत्रीय सभापति  सुमन श्रेष्ठ र मङ्गलवारे युवा क्लबका अध्यक्ष पिपलराज गिरीलाई प्रहरीले पक्राउ गरेको हो । 
चिकित्सक कुटपिट गरेको आरोपमा इलाका प्रहरी कार्यालय उर्लाबारीमा तीन जना विरुद्ध उजुरी दर्ता परेको छ । घटनामा संलग्न अर्क एक युवा भने फरार रहेको प्रहरीले जनाएको छ ।
 श्रेष्ठ र गिरीलाई  झापाको भद्रपुर ४ बाट बिहीबार पक्राउ गरेको मोरङ प्रहरीका प्रवक्ता डिएसपी ज्ञानेन्द्र बहादुर बस्नेतले जानकारी दिए । उनीहरूलाई शुक्रवार जिल्ला प्रशासन कार्यालय मोरङमा अभद्र व्यवहारमा मुद्दामा म्याद थप गरी अनुसन्धान सुरु गर्ने प्रहरीको तयारी छ ।
उनीहरूले अस्पतालमा कार्यरत मेडिकल डा. ब्रोमिस बुढाथोकीलाई कुटपिट गरेको आरोप छ । ३ जेठमा दिउँसो खाजा खाएर फर्किने क्रममा डा. बुढाथोकीमाथि सुमन श्रेष्ठ, पिपलराज गिरिको समूहले  आक्रमण गरेको बताइएको छ ।

 उनीहरूले डा. बुढाथोकीमाथि पुरानो रिसिइबिलाई लिएर आक्रमण गरेको जाहेरीमा उल्लेख छ ।  त्यसैगरी, ७ जेठमा आकस्मिक कक्षमा सेवा दिइरहेको अवस्थामा डा. अनिल यादवलाई आक्रमण गरेको आरोप रहेको छ । 
अस्पतालमा कार्यरत चिकित्सक र स्वास्थ्यकर्मीहरुले चिकित्सक कुटपिट गर्नेलाई पक्राउ गरिनुपर्ने र शान्ति सुरक्षाको ग्यारेन्टी हुनुपर्ने माग राख्दै निरन्तर रूपमा आन्दोलनमा गरिरहेका छन् ।

बुधवार अस्पतालको ओपिडी सेवा ठप्प पारेर आन्दोलनमा उत्रिएका थिए । चिकित्सक कुटपिट गर्नेलाई प्रहरीले पक्राउ गरेकोले अब चिकित्सकहरूले आन्दोलन फिर्ता गर्ने तयारी गरेका छन् ।