काठमाडौंमा आइतबार बिहानै वर्षा भएको छ । काठमाडौंमा मेघ गर्जनका साथ हल्का वर्षा हुन सुरु भएको हो । नेपालमा स्थानीय वायु, भारतको उत्तर प्रदेश, बिहार, पश्चिम बंगाल आसपास रहेको न्यून चापीय रेखा र पश्चिमी वायुको प्रभाव रहेको छ। सोही मौसमी प्रणालीका कारण केही दिनदेखि मौसम प्रतिकुल हुँदै आएको छ । 

जल तथा मौसम पूर्वानुमान महाशाखाका अनुसार काठमाडौंबाहेक आइतबार बिहान बागमती प्रदेश, गण्डकी प्रदेश, लुम्बिनी प्रदेश, कर्णाली र सुदुरपश्चिम प्रदेशमा सामान्य देखि पुर्ण बदली रही बागमती प्रदेश, गण्डकी प्रदेश र लुम्बिनी प्रदेशका केही स्थानहरूमा मेघ गर्जनसहित हल्कादेखि मध्यम वर्षा भइरहेको छ। बाँकी भूभागमा आंशिक देखि सामान्य बदली रहेको छ।  

यस्तै दिउँसो देशभर आंशिकदेखि  सामान्य बदली  रहनेछ। लुम्बिनी प्रदेश र मधेश प्रदेशका केही स्थानहरूमा मेघ गर्जन  र  हावाहुरीसहित हल्का देखि मध्यम वर्षाको पनि सम्भावना रहेको छ। देशका अन्य प्रदेशका केही स्थानमा  मेघ गर्जन र चट्याङ्ग सहित हल्का वर्षाको सम्भावना रहेको छ।

यसैगरी राति प्रदेश १, मधेश प्रदेश, बागमती प्रदेश र गण्डकी प्रदेश लगायत कर्णाली र सुदुरपश्चिम प्रदेशका पहाडी भूभागका केही स्थानहरूमा वर्षाको सम्भावना रहेको छ।