ललितपुर महानगरपालिकाका नवनिर्वाचित प्रमुख चिरीबाबु महर्जनले हिजोका उपमहानगरपालिकाका वडाहरू र नयाँ थपिएका वडामा विकासका हिसाबले एकरूपता कायम गर्ने प्रतिबद्धता व्यक्त गरेका छन् ।

महानगर प्रमुखका रूपमा निर्वाचित भएपछि बुधवार पदभार ग्रहण गर्दै प्रमुख महर्जनले अहिलेको महानगरमा हिजोको उपमहानगरपालिका, कार्यविनायक नगरपालिका र गाविस गाभिएर बनेका वडा विकासमा केही पछि रहेको उल्लेख गरे ।

सबै वडामा सामञ्जस्यता ल्याउन थपिएका वडामा बढी बजेट विनियोजन गर्ने योजना रहेको उनले बताए । वडा स्तरीय बजेट र विभिन्न तहबाट जाने अनुदान रकम साबिक गाविसभन्दा बढी विनियोजन हुने उनले बताए ।

प्रमुखका रूपमा पदभार ग्रहणसँगै प्रमुख महर्जनले ३ महत्त्वपूर्ण निर्णय गरेका छन् । वडाबाट गर्ने कुनै पनि निर्णयका लागि महानगरपालिकाको केन्द्रमा आउन नपर्ने उनले बताए । उनका अनुसार विकेन्द्रीकरण कार्यान्वयनका लागि यो पहल गरिएको हो । अहिलेसम्म चक्रपथबाहिर फोहर संकलन गर्न नसकेकाले अहिले महानगरले ट्रक किनेर संकलन शुरू गरिने निर्णय भएको प्रमुख महर्जनले बताए । ३ हप्तापछि चक्रपथ बाहिर तालिका बनाएर नियमित फोहर संकलन गरिने उनले बताए ।

राजस्व संकलन अनलाइनबाट गर्न प्रक्रिया बढाइने पनि निर्णय भएको छ । 

उपप्रमुख मञ्जली शाक्य बज्राचार्यले आफ्नो प्राथमिकतामा मुख्य विकास, समृद्धि र सुशासनयुक्त महानगरपालिका बनाउने बताए । आफूले उपप्रमुखका रूपमा जे–जे जिम्मेवारी छ नीति र विधिमा बसेर पारदर्शी रूपमा काम गर्ने उनको प्रतिबद्धता छ ।