प्रमुख प्रतिपक्षी दल नेकपा एमालेले सरकारले आइतवार संसदमा पेश गरेको बजेट सीमा र हैसियत बिर्सिएर आएको बताएको छ । 

नेकपा एमालेका उपाध्यक्ष एवं पूर्व अर्थमन्त्री विष्णु पौडेलले चुनावी सरकारले भोट बटुल्नको लागि वितरणमुखी बजेट ल्याएको बताएका हुन् । 

‘यो सरकार चुनावी सरकार हो, स्वयं अर्थमन्त्रीले चुनावको लागि समेत बजेट प्रस्ताव गर्नुभएको छ । आफ्नो सीमा र हैसियत विर्षेर बजेट आएको छ,’ बजेट वक्तव्यपछि संसद परिसरमा पत्रकारहरूसँग कुरा गर्दै पौडेलले भने, ‘बजेटमा सरकारको हैसियत विर्षेर चुनावमा भोट बटुल्ने नियत राखिएको छ ।’ 

उपाध्यक्ष पौडेलले मुलक संकटग्रस्त भएको अवस्थामा बजेटले आजका समस्या चिन्नुभन्दा कार्यान्वयन गर्न नसकिने खालको बजेट आएको बताए । 

मुद्रास्फीति ७ प्रतिशतमा राख्ने सरकारको लक्ष्य पूरा नहुने उनले बताए । 

अर्थमन्त्री जनार्दन शर्माले आइतवार प्रतिनिधि सभामा १७ खर्ब ९३ अर्ब बराबरको बजेट संसदमा सार्वजनिक गरेका थिए ।