बागमती प्रदेश सरकारले आगामी आर्थिक वर्षको नीति तथा कार्यक्रम आज सार्वजनिक गर्ने भएको छ । 

सोमवार दिउँसो २ बजे बस्ने प्रदेश सभाको बैठकमा नीति तथा कार्यक्रम प्रस्तुत गरिने कार्यसूची रहेको प्रदेश सभा सचिवालयले जनाएको छ । 

बागमती प्रदेश प्रमुख यादवचन्द्र शर्माले प्रदेश सरकारको नीति तथा कार्यक्रम प्रस्तुत गर्नेछन् । 

वैशाख १३ गतेदेखि बागमती प्रदेश सभाको दशौं अधिवेशन शुरू भएको छ । 

चालु अधिवेशनको दोस्रो दिन शनिवार दुई बैठक सञ्चालन भएका थिए । 

पहिलो बैठकमा प्रदेश सरकारको आउँदो आर्थिक वर्षको विनियोजन विधेयकका सिद्धान्त र प्राथमिकतामाथि छलफल भएको थियो । 

सोही दिनको दोस्रो बैठकमा प्रदेशका आर्थिक मामिला तथा योजनामन्त्री शालिकराम जम्मकट्टेलले विनियोजन विधेयकमाथि भएको छलफलका क्रममा प्रदेश सभा सदस्यले राखेका जिज्ञासाको जवाफ दिएका थिए ।