काठमाडौं महानगरपालिकाका नवनिर्वाचित मेयर बालेन्द्र शाहले समय अनुकूलताका कारण कसैसँग अघि वा पछि भेट हुनसक्ने तर यसलाई अन्यथा नबुझिदिन अपिल गरेका छन् ।

मेयर शाहले शुरूमा प्रमुख प्रतिपक्षी दल नेकपा एमालेका अध्यक्ष केपी शर्मा ओली र त्यसपछि बुधवार प्रधानमन्त्री शेरबहादुर देउवासँग भेट गरेका छन् ।

प्रधानमन्त्री देउवालाई भेटेपछि शाहले सामाजिक सञ्जाल फेसबूकमा लेखेका छन्, ‘समय अनुकूलताका कारण कसैसँग अघि वा पछि भेट हुन सक्छ । यसलाई अन्यथा नबुझिदिन अपिल गर्दछौं ।’

स्वतन्त्र हुनुको फाइदा सबैसँग सहकार्य गर्न सकिने शाहले बताएका छन् । ‘राजनीतिक रूपमा हामीलाई केही सजिलो पनि छ । किनकि स्वतन्त्र हुनुको अर्थ केवल चुनावमा उम्मेदवारी दिँदा मात्रै रहँदैन । स्वतन्त्र हुनुको अर्थ कुनै पनि पार्टी वा समूह वा नेताप्रति निरपेक्ष रहनु पनि हुन्छ । सबैसँग सम्मानजनक निकटताको अभ्यास गर्नुमा पनि हुन्छ । काठमाडौंको उन्नति, समृद्धि र सकारात्मक परिवर्तनका लागि हामीले छलफल गर्न, सुझाव समेट्न र सहकार्यका लागि पहल गर्न धेरैभन्दा धेरै व्यक्तित्वसँग भेटघाट गर्ने गरेका छौं । यो सिलसिला उम्मेदवारी घोषणा गर्नुभन्दा पहिलेदेखि शुरू भएर निकै पछिसम्म पनि रहिरहने छ,’ उनले लेखेका छन् ।
 
ओली र देउवासँग भएको भेटघाटपछि उनले लेखेका छन्, ‘उहाँहरूले दिनुभएको प्रेरणाले हामीलाई थप उर्जावान बनाएको छ ।’