भारतबाट फेरि पेट्रोलको मूल्य बढेर आएको नेपाल आयल निगमले जनाएको छ । यसअघि पेट्रोलको खरिद लागत १९४.६४ रुपैयाँ प्रतिलिटर रहेकामा भारतीय आयल निगमले पठाएको नयाँ मूल्यसूचीअनुसार लागत मूल्य बढेर २०२ रुपैयाँ ९३ पैसा पुगेको हो । 

बुधबार भारतीय आयल निगमले पठाएको नयाँ मूल्य सूचीअनुसार पेट्रोलमा रु२२.९३, डिजेलमा रु १९.७३, एलपी ग्यासमा प्रति सिलिण्डरमा रु ७५१.१४ घाटा हुने देखिएको नेपाल आयल निगमले जारी गरेको विज्ञप्तिमा उल्लेख छ ।  हवाई इन्धन र मट्टितेलमा केही नाफा रहेपनि समग्रमा निगमलाई मासिक ६ अर्ब १५ करोड रुपैयाँ घाटा हुने स्थिति रहेको निगमको विज्ञप्तिमा उल्लेख छ । 

 नयाँ मूल्यसूचीका आधारमा पाक्षिक रुपमा पेट्रोलमा रु ६७ करोड, डिजेलमा रु १ अर्ब ३० करोड र एलपी ग्यासमा रु १ अर्ब ४३ करोड अझै घाटा नै रहेको स्थिति निगमका सहप्रवक्ता पुष्कर कार्कीले जानकारी दिए ।  उनले भारतीय निगमलाई मे महिनामा पेट्रोलियम पदार्थ खरिद वापतको रकम रु ४३ अर्व भुक्तानी गर्नु पर्नेमा सम्झौता मुताविक भुक्तानी गर्न नसकी २३ मे, २०२२ सम्म रु २२ अर्ब ४० करोड बक्यौता कायम रहेको पनि जानकारी दिए । 
निगमले गत जेठ ८ गतेमात्रै एकैपटक पेट्रोलियम पदार्थको मूल्य भारी वृद्धि गरेको थियो । जसअनुसार पेट्रोलको भाउ प्रतिलिटर १८० रुपैयाँ पुगेको छ।