राप्रपा नेपालका अध्यक्ष कमल थापाले प्रदेश सरकार नचाहिने बताएका छन् । आइतवार राप्रपा नेपाल विराटनगरले आयोजना गरेको पत्रकार सम्मेलनमा बोल्दै उनले केन्द्र र स्थानीय सरकार मात्रै चाहिने बताएका हुन् । स्थानीय तहलाई अझ अधिकार दिएर सम्पन्न बनाए प्रदेश सरकार नै नचाहिने उनको भनाइ रहेको छ । 

जनताबाट प्रत्यक्ष निर्वाचित प्रधानमन्त्री र संसदबाट निर्वाचित राष्ट्रपति बनाउनुपर्ने उनले जोड दिए ।  

नेपालमा धर्म परिवर्तनको डढेलो लागेको उनले बताएका छन् । उनले धर्म निरपेक्षताको आडमा योजनाबद्ध हिसाबले हिन्दू धर्ममाथि प्रहार हुँदा समेत सरकार मौन बसेको आरोप लगाएका छन् । 

यस्तै उनले राजसंस्था पुनस्र्थापना हुने सम्भावना समाप्त भएपछि राजसंस्थाको मुद्दा त्यागेको समेत उनले बताए । जनतालाई भुलभुलैयामा पार्नु हुँदैन भनेर राजसंस्थाको मुद्दा छाडेको उनको भनाइ छ । 

‘टाउकोमा कपन बाँधेर १५ वर्ष सम्म हिँडियो, तर राजाको तर्फबाट कुनै सकारात्मक कदम अगाडि बढेन,’ उनले भने, ‘जनता र राजनीति दलको मन जित्ने कुनै पनि सकारात्मक काम राजा र उनको सचिवालयबाट भएन बरु राजतन्त्रको मुद्दा बोक्नेलाई पटक–पटक प्रहार मात्रै भयो ।’

विदेशी र नेपाली सेनाले ल्याएर राजा राखिदिँदैमा राजतन्त्र नफर्कने उनको भनाइ छ ।