गृहमन्त्री बालकृष्ण खाणले अदालत परिसरमा गोली चल्नु ज्यादै संवेदनशील घटना भएको बताएका छन् । 

जिल्ला अदालत नवलपरासीमा सोमवार अंश मुद्दाका एकजना झगडियाले गोली चलाएका थिए ।

मंगलवार प्रतिनिधि सभा बैठकमा गृहमन्त्री खाणले रामग्राम नगरपालिकाका हंशराज यादवले काकी नातापर्ने रोशनी यादवसँग जग्गाको झगडामा अदालत परिसरमा गोली चलाएको जानकारी दिएका हुन् । 

‘गोलीबाट कुनै मानवीय क्षति भएन कोही घाइते भएको छैन । तर यो ज्यादै सेन्सेटिभ घटना हो,’ मन्त्री खाणले भने, ‘गोली चलाउने हंसराज यादव भागेको छ, प्रहरीले भेटिन्छ भनेको छ । छिट्टै पक्राउ पर्ला ।’ 

अदालत परिसरमा गोली चलेको घटनापछि तराईका जिल्लामा अवैध हतियारको बिगबिगी रहेको भन्दै चिन्ता व्यक्त भएको छ ।