नेकपा एकीकृत समाजवादीको तर्फबाट शहरी विकास मन्त्रीमा सिफारिस भएका सांसद मेटमणि चौधरीले बिहीवारसम्ममा मन्त्री पदको शपथ ग्रहण गरिसक्ने बताएका छन् ।

बुधवार प्रतिनिधि सभा बैठकका लागि नयाँबानेश्वरस्थित संसद भवन पुगेका सांसद चौधरीले सञ्चारकर्मीलाई संक्षिप्त प्रतिक्रिया दिँदै मन्त्री पदको शपथ ग्रहण बिहीवारसम्ममा गरिसक्ने बताए ।

उनले बुधवार नै शपथ ग्रहण हुनसक्ने सम्भावना रहेको पनि बताए । उनले जनता समाजवादी पार्टी (जसपा) नेपालले पार्टीको आन्तरिक समस्या सम्बोधन गर्नका लागि केही दिन समय मागेका कारण एकीकृत समाजवादीबाट मन्त्रीमा सिफारिस भएकाहरूको शपथ ग्रहण रोकिएको बताए ।

सांसद चौधरीले पार्टीले गरेको निर्णय कार्यान्वयन हुने बताए । उनले भने, ‘पार्टीले निर्णय गर्‍यो । निर्णय गरिसकेपछि कार्यान्वयन हुन्छ तर आज हामी ५ दलीय गठबन्धनभित्रकै एउटा दल हो । एउटा पार्टी हो । हामीले शपथ ग्रहण गर्ने टाइम कन्फर्म गरिराख्दाखेरी जसपाका साथीहरूले केही दिन हामीलाई पनि पार्टी भित्रको आन्तरिक समस्या सम्बोधनका लागि केही समय चाहिन्छ भनेपछि केही समय केही दिन ढिला मात्रै भएको हो । मन्त्री त सम्भवतः आज नभए भोलिसम्म फाइनल हुन्छ । आज भएन भने शपथ ग्रहण भोलि पक्कै हुन्छ ।’

उनले माओवादी केन्द्र र नेपाली कांग्रेसलाई पनि मन्त्री हेरफेर गर्ने दबाब रहेको भन्दै सबै पार्टीले एकैपटक शपथ गराउनका लागि शपथ ग्रहण पछि सार्न पार्टी अध्यक्ष माधवकुमार नेपाल पनि सहमत भएका बताए ।