पृथ्वी राजमार्गअन्तर्गत तनहुँको आँबुखैरेनी गाउँपालिका–४ साँखरस्थित ड्याम नजिक सडक  भासिएको छ । 

सडक भासिँदा एउटा कार र मोटरसाइकल समेत त्यहाँ फसेको अनुमान गरिएको जिल्ला ट्राफिक प्रहरी कार्यालय तनहुँका प्रहरी नायब निरीक्षक गोकर्ण नेपालले लोकान्तरलाई जानकारी दिएका छन् । 

उनका अनुसार, सो ठाउँमा कार र मोटरसाइकल फसेको हो वा होइन भन्नेबारे यकिन भइसकेको छैन । तर अनुसन्धानका लागि गोताखोर परिचालन भइसकेको समेत उनले जानकारी दिए । 

उनले भने,‘प्रारम्भिक अनुमानमा एउटा कार र एक मोटरसाइकल त्यहाँ फसेको भन्ने देखिन्छ । त्योबारे अनुसन्धान तथा उद्दारका लागि गोताखोरको टिम परिचालन भइसकेका छन् ।’

सडक भासिँदा दुवैतर्फको सवारी आवागमन अवरुद्ध भएको समेत उनले जानकारी दिए । 

गए रातिदेखि परेको अविरल वर्षाका कारण सडकको भाग भासिएको हो ।

सडकको भाग तलबाट भाँसिएकाले बेलिब्रिज नराखेसम्म सवारी आवतजावतमा सम्भव नदेखिएको  प्रनानी नेपालले जानकारी दिए ।

अहिले त्यहाँ मौसममा केही सुधार भएको छ । यद्यपी नदी भने बढिरहेको उनको भनाइ छ ।