सुन्दरी प्रतियोगिताको आडमा युवती बलात्कार गरेको आरोपमा प्रहरीले मनोज पाण्डेलाई पक्राउ गर्‍यो । 

सन् २०१४ मा भएको ‘मिस ग्लोबल इन्टरनेसनल’ प्रतियोगिताको सहभागीलाई होटलमा बोलाएर बलात्कार गरेको आरोपमा पाण्डेलाई प्रहरीले जेठ ७ गते पक्राउ गरेको थियो ।

पाण्डेले बलात्कारपछि फोटो र भिडियो खिचेर ‘ब्ल्याकमेल’ गर्दै ६ महिनासम्म निरन्तर यौन शोषण गरेको घटना पीडितले सार्वजनिक गरेपछि घटनाबारे छानबिन गर्न दबाब बढेको थियो । 

यस विषयमा बालुवाटारस्थित प्रधानमन्त्री कार्यालयअगाडि अधिकारकर्मीहरूले आन्दोलन गरेका थिए । संसद्मा समेत बलात्कारको विषयमा आवाज उठेपछि सभामुख अग्निप्रसाद सापकोटाले यस विषयमा तत्काल छानबिन गर्न सरकारलाई रुलिङ गरेका थिए । 

त्यसपछि सरकारले काठमाडौं उपत्यका अपराध अनुसन्धान कार्यालयका प्रमुख एसएसपी वसन्त कुँवरसहित ५ जनाको समिति बनाएको थियो । त्यो समितिले पाण्डेलाई पक्राउ गरेको थियो ।

प्रहरीको परामर्शमा पीडित युवतीलाई जिल्ला अदालतमा जाहेरी दिन लगाएर बयान प्रमाणित गरिएको थियो । आफूलाई यौन दुव्र्यवहार गरेको भन्दै १६ वर्षभन्दा कम उमेरकी एक किशोरीले पनि प्रहरीमा जाहेरी दिएकी थिइन् ।

पीडित युवतीले सहयोग माग्दा अस्वीकार गरेको भनेर नाम लिएकी पूर्व मिस नेपाल मल्भिका सुब्बासँग पनि प्रहरीले बयान लिएको थियो ।

बयानमा माल्भिकाले पीडित युवतीले फोन गरेको स्वीकारेकी थिइन् । उनले त्यो समयमा आफू पनि समस्यामा भएका कारण ध्यान पुग्न नसकेको बताइन् ।

यसले प्रहरीलाई परिस्थितिजन्य प्रमाण जुटाउन सहयोग पुगेको छ ।  

बलात्कार अभियोगमा हद म्यादका कारणले उनलाई पक्राउ गर्न नमिल्ने भएपछि मानव बेचबिखन तथा ओसारपसारको अभियोगमा जिल्ला अदालतबाट अनुमति लिएर प्रहरीले हिरासतमा राखेको छ ।

सरकारले बलात्कार मुद्दामा १ वर्षको हद म्यादलाई पुनर्विचार गर्न विभिन्न संसदीय समिति र कानून विज्ञहरूसँग परामर्श गरिरहेको छ । यौन अपराध र बलात्कारको केसमा हद म्याद हटाउनुपर्ने भन्दै विभिन्न समूहले सडकबाट दबाब दिइरहेका छन् । यो केस बाहिर आएपछि काठमाडौं उपत्यकालगायत देशभरमा बलात्कारका घटनाहरू बाहिर आउन थालेका छन् । 

इटहरिको ब्लुमिङ लोटस इंग्लिस स्कूलमा कक्षा ९ मा अध्ययनरत छात्रालाई विद्यालयका प्रिन्सिपलले २ वर्षसम्म लगातार बलात्कार गरेको खुलासा भयो ।

विद्यालयबाट रेस्टिकेट गरिदिने धम्की दिँदै बलात्कार गरेको पीडितले आरोप लगाएकी थिइन् ।

पीडितले उपचार गरिदिने बहानामा आफूलाई निरन्तर बलात्कार गरेको भन्दै आरोपितको नाम र फोटो राखेर इन्स्टाग्राममा पोस्ट गरेकी थिइन् । 

२०७४ साउन २६ गते सुनसरीको धरान उपमहानगरपालिका– १० स्थित बीपी कोइराला स्वास्थ्य विज्ञान प्रतिष्ठान जाने बाटोमा पर्ने जनहित गेस्ट हाउसमा प्रिन्सिपल राजकुमार खड्काले बलात्कार गरेको आरोप छ । 

आमाबुवाको अगाडि हेरचाह गरेको जस्तो गर्ने र होस्टेलमा बारम्बार बलात्कार गर्ने गरेको आरोप उनले लगाएकी छिन् । यो घटना बाहिरिएलगत्तै आरोपित खड्का फरार भएका थिए ।

सामाजिक सञ्जालमा घटना बाहिरिएलगत्तै दबाबमा परेको प्रहरी हेडक्वार्टरको निर्देशनमा उनको खोजी शुरू भएको थियो । काठमाडौंमा लुकेर बसेका उनलाई केन्द्रीय अनुसन्धान ब्यूरो (सीआईबी)ले १२ गते पक्राउ गरेको थियो । पक्राउ परेका प्रिन्सिपल खड्कालाई थप अनुसन्धानका लागि सुनसरी पठाइएको थियो । प्रहरीले हिरासतमा लिएर उनको अनुसन्धान गरिरहेको छ ।

यौन दुर्व्यवहारका घटना बाहिरिने होडमै जेठ १० गते चाबहिलको सेन्ट लरेन्स कलेजका संयोजक जनार्दन अधिकारीले विद्यार्थीलाई कलेजबाट निस्कासन गर्ने धम्की दिँदै यौन दुव्र्यवहार गर्ने गरेको भन्दै विद्यार्थीहरूले आन्दोलन गरेका थिए । 

कलेजको ११ कक्षामा पढ्ने विद्यार्थीलाई २ महिनादेखि आफ्नो ‘बेड पार्टनर बन’ भन्दै म्यासेज गर्ने र प्रत्यक्षरूपमा पनि भन्ने गरेको खुलासा भएपछि विद्यार्थीले आन्दोलन गरे ।

अधिकारीले ती विद्यार्थीलाई आफूले भनेको कुरा बाहिर कसैलाई भनेमा परीक्षा दिन नमिल्ने बनाइदिने र कलेजबाट निष्कासन गरिदिनेसम्मको धम्की दिएको आरोप छ ।

अभिभावकले आरोपितविरुद्ध गौशाला वृत्तमा किटानी जाहेरी दिएका छन् । त्यसपछि प्रहरीले जिल्ला अदालत काठमाडौंबाट अनुमति लिई हिरासतमा राखेर अनुसन्धान गरिरहेको छ । 

पछिल्लो समयमा पुराना बलात्कारका केसहरू बाहिर आइरहेका छन् । नेपाल प्रहरी केन्द्रीय कार्यालयको तथ्यांकअनुसार पछिल्लो ३ महिनामा ५८७ वटा बलात्कारका केस बाहिर आएका छन् । 

२०७८ फागुन महिनामा १८१, चैत महिनामा २०५ र २०८९ को वैशाख महिनामा २०१ गरी ५७८ वटा घटना बाहिर आएको प्रहरी केन्द्रीय कार्यालयका प्रवक्ता एसएपी विष्णुकुमार केसीले जनाकारी दिए ।

उनका अनुसार ११ देखि १६ वर्षका बालिकाहरू बढी बलात्कारको शिकार भएका छन् । 

फागुन महिनामा ७६, चैत महिनामा ९० र वैशाख महिनामा ८८ गरी कुल २५४ जना बालिका बलात्कारको शिकार भएका हुन् ।

त्यसपछि १६ देखि १८ वर्ष उमेरका युवतीहरू बलात्कारको शिकार भएको प्रहरी प्रधान कार्यालयको तथ्याङ्कले देखाउँछ । 

जसअनुसार फागुन महिनामा २७, चैत महिनामा २७ र वैशाखमा २२ गरी ७७ जना युवतीहरू बलात्कारको शिकार भएको देखिन्छ । 

प्रहरी प्रधान कार्यालयको तथ्यांकलाई केलाउने हो भने पनि १८ वर्षभन्दा मुनिका बालिका/युवतीहरू बलात्कारको शिकार भएको देखाउँछ ।