अमेरिकी सेना निकै घातक रूपमा आएको छ : प्रकाण्ड

नेपाल कम्युनिस्ट पार्टीका प्रवक्ता प्रकाण्डले अमेरिकी सेना नेपालमा निकै घातक रूपमा आएको बताएका छन् ।

अमेरिकी सेनाका एसिया प्यासिफिक कमाण्डका प्रमुख जर्नेल चाल्र्स एन्थोनी फिलिन्ले गरेको नेपाल भ्रमणप्रति पार्टीले ध्यानाकर्षण भएको जनाएको छ ।

‘मुख्यतः राष्ट्रघाती एमसीसी सम्झौता संसदबाट पारित गरिसकेपछि नेपालमा अमेरिकाले आफ्नो प्रत्यक्ष उपस्थितिलाई मजबुत बनाउँदै आफ्ना गतिविधिहरू बढाइरहेको छ,’ विज्ञप्तिमा उल्लेख छ, ‘यसले एकातिर नेपालको राष्ट्रिय स्वाधिनता र सार्वभौम अधिकारमाथि खुलमखुल्ला धावा बोलेको छ । यो निकै घातक रूपमा आएको छ । यस प्रकारको अमेरिकी साम्राज्यवादको हस्तक्षेपकारी रवैयाको हाम्रो पार्टी घोर विरोध र भत्र्सना गर्दछ ।’

अमेरिकाले प्रस्ताव गरेको स्टेट पार्टनरशिप प्रोग्राम (एसपीपी) को १० बुँदे सम्झौता नेपाली जनता र राष्ट्रका विरुद्ध भएकाले सम्पूर्ण जनसमुदाय एकताबद्ध हुन र साम्राज्यवादी हस्तक्षेपको विरोध गर्न अपिल गरिएको छ ।