पेट्रोलियम पदार्थमा भएको मूल्यवृद्धिको विरुद्धमा नेकपा एमाले निकट विद्यार्थी संगठनले आन्दोलन शुरू गरेको छ । 

आइतवार मध्यरातमा पेट्रोलियम पदार्थमा भारी मूल्यवृद्धि गरेसँगै विद्यार्थी संगठनहरूले आन्दोलन शुरू गरेका हुन् । 

बुटवलमा अनेरास्ववियुले सोमवार बिहानै प्रदर्शन गरेका छन् । 

बुटवल क्याम्पस अगाडि विद्यार्थीहरूले मूल्यवृद्धिको विरुद्धमा प्रदर्शन गरेका हुन् । 

सरकारले मूल्यवृद्धि फिर्ता नगरेसम्म आन्दोलन नरोकिने अनेरास्ववियु रुपन्देहीका अध्यक्ष शेषकान्त पोखरेलले जानकारी दिए । 

बहुमुखी क्याम्पस अगाडि सडकमा जम्मा भएका अनेरास्ववियुका कार्यकर्ताले यातायात बन्द गर्नुका साथै टायर बालेर नाराबाजी गरि रहेका छन् ।

यता अनेरास्ववियु केन्द्रीय कमिटीले पनि देशभर  मूल्यवृद्धिको विरुद्धमा आन्दोलन शुरू गर्ने तयारी गरेको छ ।

'अबको केही घन्टामै हामीलाई सडकमा देख्नुहुन्छ,' अनेरास्ववियुका  वरिष्ठ उपाध्यक्ष आरसी लामिछानेले लोकान्तरसँग भने,'मूल्यवृद्धि र सरकारको एकसाथ विरोध गर्छौं ।'

उनले सरकार जनताको पक्षमा नरहेको थप पुष्टि भएको समेत बताए । 

उनले भने,'हामीले देशभर मूल्यवृद्धि र सरकारको विरुद्धमा तथा जनताको पक्षमा आन्दोलन गर्ने तयारी गरेका छौं ।'

निगमले पेट्रोलमा प्रतिलिटर २१ रुपैयाँ वृद्धि गरेको छ । पेट्रोलको मूल्य अब प्रतिलिटर १ सय ९९ पुगेको छ । यसअघि पेट्रोलको मूल्य प्रतिलिटर १७८ रुपैयाँ थियो । 

डिजेलमा पनि एकैपटक २७ रुपैया वृद्धि भएको छ । डिजेलको मूल्य अब प्रतिलिटर १९२ रुपैयाँ पुगेको छ ।  

तस्वीर : प्रकाश आचार्य, बुटवल