नेकपा एमालेको उपाध्यक्ष त्यागेर बसेका वामदेव गौतमले मंगलवार नेकपा (एकता समन्वय समिति) घोषणा गर्ने भएका छन् ।

निर्वाचन आयोगमा दर्ता भएका र नभएका दललाई एकीकृत गरी गौतमले नेकपा एकता समन्वय समिति घोषणा गर्न लागेका हुन् । 

नेपालका सबै कम्युनिस्ट पार्टीलाई एकीकृत गर्ने गरी अभियान घोषणा हुन लागेको एकता समन्वय समितिका नेता डीबी कार्कीले जानकारी दिए । ‘सकेसम्म एउटै चिह्यनबाट चुनाव लड्ने नभए वामपन्थी दलबीच चुनावी मोर्चा र तालमेलका लागि पृष्ठभूमि बनाउन लागिएको हो,’ कार्कीले लोकान्तरसँग भने ।

शनिवार ललितपुरमा भएको नेकपा एकता अभियानको दोस्रो भेलाले पार्टी नै घोषणा गर्ने निर्णय गरेको थियो । आज घोषणा हुन लागेको अभियानले नेकपा एमाले, माओवादी केन्द्र र नेकपा एकीकृत समाजवादीलाई समेत चुनावी मोर्चामा ल्याउने कार्कीले दाबी गरे । 

एमाले र माओवादी मिलेर बनेको नेकपा विभाजनको साइडइफेक्टले चौथो दल बन्न लागेको हो । नेकपा विभाजन भएपछि एमाले, माओवादी र एकीकृत समाजवादी बनेका थिए ।