नेपाल भ्रमणमा रहेका चिनियाँ कम्युनिस्ट पार्टी (सीपीसी)का विदेश विभाग प्रमुख लिउ जियानचाओको नेतृत्वको प्रतिनिधि मण्डलले एमाले अध्यक्ष केपी ओली निवासमा चार घण्टाभन्दा बढी समय बिताएको छ ।

चिनियाँ प्रतिनिधि मण्डल द्विपक्षीय भेटवार्ताका लागि मंगलवार बिहान १० बजे ओली निवास पुगेका थिए । 

उनीहरूबीचको भेटवार्तामा एमाले अध्यक्ष ओलीले नेपाल र चीनको बीचमा कुनै पनि समस्या नरहेको बताएको छलफलमा सहभागी एमालेका विदेश विभाग प्रमुख राजन भट्टराईले बताए । 

चिनियाँ प्रतिनिधि मण्डलको टोलीले ओली निवासमै खाना खाएको थियो । खान खानका लागि करीब डेढ घण्टाको समय लागेको भट्टराईले बताए । 

त्यसबाहेकको समयमा भएको छलफलमा एमाले अध्यक्ष ओलीले अन्तर्राष्ट्रिय शक्ति सन्तुलनमा फेरबदल आउँदा समेत नेपाल एक चीनप्रति प्रतिबद्ध रहने बताएको भट्टराईले जानकारी दिए । ओलीले नेपाली भूमि चीनविरुद्ध प्रयोग हुन नदिनेमा चिनियाँ प्रतिनिधि मण्डललाई आश्वस्त पार्ने प्रयास गरेको भट्टराईले बताए । 

छलफलमा पछिल्लो समय नेपालमा चीन विरोधी गतिविधिले स्थान पाएको संकेत गरिएको थियो । त्यसबारेमा एमालेको प्रतिनिधि मण्डलले एमालेले सरकारको नेतृत्व गरेको बेलामा चीनविरोधी गतिविधि हुन नदिन सचेत रहेको बताएको थियो । 

‘विगतदेखि नै हामी एक चीन नीतिमा अडिग छौं र विगतमा जस्तै नेपाली भूमिमा चीनसहित हाम्रो कुनै पनि मित्रराष्ट्रहरूविरुद्ध गतिविधि हुन दिँदैनौं,’ चिनियाँ प्रतिनिधि मण्डललाई ओलीले भनेका थिए ।

पारस्परिक लाभ र समानताको आधारमा सम्बन्ध राख्ने कुरामा आफूहरू स्पष्ट रहेको ओलीले बताएको भट्टराईले बताए । त्यसबाहेक, चीनले प्रस्ताव गरेको बेल्ट एण्ड रोड इनिसिएटिभ्स (बीआरआई) कार्यान्वयनलाई अघि बढाउनुपर्नेमा जोड दिएको भट्टराईले बताए ।

भेटमा चिनियाँ प्रतिनिधि मण्डलले चीनप्रति राखेको सकारात्मक दृष्टिकोणप्रति धन्यवाद र खुशी व्यक्त गरेका थिए । 

त्यसैगरी, चीनले नेपाललाई विकास साझेदाररुपमा अघि बढाउँदै आएको र आगामी दिनमा पनि सहकार्यको चाहना राखेको बताएको भट्टराईले बताए ।