रूपन्देहीको तिलोत्तमा नगरपालिकाका प्रमुख प्रशासकीय अधिकृत जीवन ज्ञवालीको कार्यकक्षमा नेकपा एमालेबाट निर्वाचित जनप्रतिनिधिले आइतवार तालाबन्दी गरेका छन् । 

नगर सभामा विवाद बढ्दै जाँदा अधिकृत ज्ञवालीले एकपक्षीय ढंगबाट काम गरेको आरोप लगाउँदै उपप्रमुख जगेश्वरी चौधरीको नेतृत्वका प्रतिनिधिले ताला लगाएका हुन् ।

आइतवारको नगर सभामा गणपुरक संख्या नपुगेको भन्दै नगर प्रमुख रामकृष्ण खाँणले बैठक स्थगित गरेपछि एमालेका जनप्रतिनिधिले नाराबाजी गरेका थिए । 

नगरपालिकाको १२औं नगर सभाको तेस्रो र चौथो बैठकको उपस्थित र गणपुरक संख्यामा ज्ञवालीको भूमिका विवादास्पद रहेको एमाले निकट जनप्रतिनिधि बताएका छन् । उपप्रमुख चौधरीले प्रशासकीय अधिकृत ज्ञवालीले नियोजित रूपमा नगर सभाका एकैदिनका बैठकमा अलग–अलग उपस्थिति गराउने गरेको आरोप लगाइन् । 

‘हामीले गरेको उपस्थिति पुस्तिका गायब पारेर प्रशासकीय अधिकृत ज्ञवालीको योजनामा कांग्रेसबाट निर्वाचित जनप्रतिनिधिको मात्रै उपस्थिति तयार गरी हस्ताक्षर गराएकाले नैतिक हिसाबले अब ज्ञवाली नगरपालिकाको प्रशासकीय अधिकृत स्वीकार्य छैनन्,’ चौधरीले भनिन्, ‘आइतवार बोलाइएको नगर सभाको चौथो बैठकमा सबै जनप्रतिनिधि उपस्थित भए पनि एमालेका ४२ जना प्रतिनिधिले हस्ताक्षर गरेपछि कांग्रेसका उपस्थित भएर पनि हाजिर गरेनन् । एमालेका उपस्थित बाँकीलाई हस्ताक्षर गर्न दिइएन । यो काम प्रमुख प्रशासकीय अधिकृतको योजनामा भएको हो ।’

नगर प्रमुख रामकृष्ण खाँणले घोषणा गर्दा एमालेका ४२ जनाको उपस्थिति गरेको माइन्यूट अनाधिकृत व्यक्तिमार्फत लुकाउन खोज्दा नियन्त्रणमा लिइएको उनले बताइन् । एमाले र कांग्रेसबीच विवाद हुँदा तिलोत्तमाको बजेट पारित हुन सकेको छैन । 

एमालेका जनप्रतिनिधि समयमा बैठकमा नआएको नगर प्रमुख खाँणको दाबी छ । ‘१ बजे भनेको बैठक २ बजेपछि आएर सभा अध्यक्षले सही गरेपछि सही गर्न पाइन्छ ? यो खेतमा मजदुरी गर्न आएजस्तो होइन । बाटोमा आउँदै थिए, बस पाइएन भनेजस्तो होइन । नगर सभामा मर्यादित भएर आउनुपर्‍यो नि ?’ प्रमुख खाँणले भने ।