ताप्लेजुङमा रहेको प्रसिद्ध तीर्थस्थल पाथीभरा जाने पदर्मागमा फाइबरको ट्रस हालिएको छ । हिमपातको समयमा हिउँले पुरिएर बाटो भुलिने र हिउँमा चिप्लिने जस्ता हैरानी खेप्नुपर्ने भएकाले ट्रस हालिएको हो । 

पाथीभरा क्षेत्र विकास समितिका कार्यकारी निर्देशक मनमणि काफ्लेका अनुसार उक्त पदमार्गमा गत साता ९४ मिटर ट्रस लगाउने कार्य सम्पन्न भएको छ ।  सरकारबाट प्राप्त रु ३० लाख बजेटले समितिले सो ट्रस लगाएको हो । 

सो पदमार्गमा प्रत्येक वर्ष क्रमिकरुपमा मर्मत गर्ने, सोलिङ, रेलिङ र ट्रस लगाउँने कार्य भइरहेको समितिले जनाएको छ । अहिलेसम्ममा मन्दिरदेखि करिब ६ सय मिटर ट्रस लगाएको कार्यकारी निर्देश काफ्लेले बताए । उनले भने, ‘यसपटक ट्रस  लगाउने काम ठूलो घण्टी भन्ने ठाउँसम्म विस्तार गरिएको छ । हिमपातको बेला अधिक चिप्लो हुने त्यस भन्दा तलको भागमा रेलिङ हालिएको छ ।’

कार्यकारी निर्देशक काफ्लेका अनुसार बाटोमा सार्वजनिक धारा निर्माण गरिएको छ । छिट्टै पम्पिङ गरेर धारामा पानी झारिने छ । बाटोमा शौचालय थपिएको छ । पानीको आपूर्तिसँगै शौचालयको सफाइ सहज बन्ने छ । कान्छिथान नजिक शान्त स्थानमा ध्यान केन्द्रसमेत निर्माण  गरिएको छ । मन्दिरदेखि क्रमिकरुपमा साढे दुई किलोमिटर माथिल्लो फेदीसम्म ट्रस लगाउने समितिको लक्ष्य छ । 

कार्यकारी निर्देशक काफ्लेले समितिसँगको समन्वयमा उकालो बाटो सुधार गरी सहज बनाइएको बताए । ‘ग्रामीण बस्तीबाट पाथीभरा आउने पैदल मार्ग विकास गरिएको छ,’ उनले भने, ‘पाथीभरामा एक उद्धार केन्द्र, चिया खाने ठाउँ, आराम स्थल र शौचालयको लागि प्रिफ्याब घर निर्माण भइरहेको छ ।’