सांसदहरू हाजिर गरेर घर हिँडेपछि गणपूरक संख्या नपुग्दा प्रतिनिधि सभा बैठक १५ मिनेटको लागि स्थगित भएको छ । 

आइतवार बसेको प्रतिनिधि सभा बैठकमा कारागार विधेयक निर्णयार्थ पेश गर्ने कार्यसूची थियो । आइतवार अपराह्न साढे ४ बजेको समयमा विधेयकलाई निर्णयार्थ पेश गर्ने क्रममा आवश्यक गणपूरक संख्या नभएपछि सभामुख अग्नि सापकोटाले बैठक १५ मिनटका लागि स्थगित गरेका छन् । 

सभामुखले विधेयक निर्णयार्थ पेश गर्ने क्रममा नेमकिपा सांसद प्रेम सुवालले संख्या यकिन गर्न माग गरेका थिए । त्यसपछि सभामुखले तीन मिनेट घण्टी बजाएर संख्या गणना गर्दा २ सांसदको संख्या अपुग भएको हो । 

संविधानको धारा ९४ अनुसार कुनै प्रस्ताव पेश गर्दा प्रतिनिधि सभामा तत्काल कायम संख्याको एक चौथाई उपस्थित हुनुपर्ने व्यवस्था छ । आइतवार अपराह्न गणना गर्दा ६७ जनामात्र उपस्थित थिए । कुनै प्रस्ताव निर्णयार्थ पेश गर्दा एक चौथाई अर्थात ६९ जना उपस्थित हुनुपर्ने व्यवस्था छ । 

सांसदहरूले हाजिर गरेर हिँड्ने गरेपछि संसदमा कोरम पु¥याउन मुस्किल हुने गरेको छ । संसदमा हाजिर गरेपछि सांसदले बैठक भत्ता र ट्याक्सी भाडा पाउँछन् ।