संसदीय समितिले चिनी मिलको समस्या तत्काल समाधान गर्न सरकारलाई निर्देशन दिएको छ ।  प्रतिनिधि सभाअन्तर्गतको उद्योग तथा वाणिज्य र श्रम तथा उपभोक्ता हित समितिले सरकारलाई चिनी मिलको समस्या समाधान गर्न निर्देशन दिएको हो । 

आइतवार समितिले सरोकारवाला मन्त्रालय र सम्बन्धित पक्षसँग आवश्यक छलफल गरेको थियो । समितिर्ले  उद्योग, वाणिज्य तथा आपूर्ति मन्त्रालयलाई चिनी उद्योगमा कार्यरत मजदुर, उखु किसान र चिनी मिलका प्रतिनिधिसमेतलाई राखेर छलफल गराउन भनेको छ । 

समितिका सभापति विमलप्रसाद श्रीवास्तवले मन्त्रालयको समन्वयमा छलफल गराएर समस्या समाधान गर्न निर्देशन दिइएको जानकारी दिए । 

चिनी मिलले धेरैजसो किसानको उखुको रकम भुक्तानी नगरेकोलगायतका समस्या देखिएको छ । किसान तथा मजदुरहरूको आन्दोलनका कारण कतिपय मिल बन्द हुने अवस्थामा रहेका छन् । चिनी मिल बन्द हुन नदिन सरकार गम्भीर बन्नुपर्ने सांसदहरूको माग छ ।