संस्कृति, पर्यटन तथा नागरिक उड्डयनमन्त्री जीवनराम श्रेष्ठले सर्वसाधारणको समस्या समाधान गर्न सरकार प्रतिबद्ध रहेको बताएका छन् । आइतवार नेकपा (एकीकृत समाजवादी) को केन्द्रीय कार्यालय आलोकनगर पुगेर कार्यकर्ता तथा जनताको गुनासोबारे जानकारी लिँदै उनले सर्वसाधारणको आम चासोका समस्या समाधान गर्ने प्रतिबद्धता जनाएका हुन् । 

मन्त्री श्रेष्ठसँग सर्वसाधारण तथा कार्यकर्ताहरूले व्यक्तिगत काम, स्थानीय समस्या तथा पूर्वाधार सम्बन्धी समस्या समाधानको माग गरेका थिए । करिब दुई घण्टा पार्टी कार्यालय कार्यकर्ताको गुनासो सुनेका मन्त्री श्रेष्ठसँग झण्डै एकसय जनाले गुनासो राखेका थिए । 

सबैको गुनासो सुनिसकेपछि मन्त्री श्रेष्ठले जनताको समस्या समाधानमा आफू केन्द्रित हुने प्रतिबद्धता व्यक्त गरेका थिए । उनले आफूले कार्यभार सम्हालेको छोटो अवधिमै नेपालको पर्यटन क्षेत्र पुनरुत्थान कार्ययोजना ल्याई कार्यन्वयन अघि बढाएको बताएका थिए । 

आम नागरिकलाई मन्त्रालयमै गएर गुनासो राख्न असहज रहेको अवस्थामा पार्टी कार्यालयमा जनताको गुनासो सुन्ने व्यवस्थाले सेवाग्राहीलाई सजिलो भएको उनको भनाइ छ । आफूले लक्ष्य तोकेर अघि बढाएका योजनाहरूको परिणाम केही समयभित्र देखिने र त्यसले मुलुकलाई दीर्घकालीन रूपमा फाइदा हुने उनको दाबी छ । 

एकीकृत समाजवादीले नेता, सांसद र मन्त्रीसम्म पहुँच नभएका नागरिकहरूको गुनासो सुनेर समाधान गर्न पार्टीका हरेक मन्त्रीलाई हप्ताको एक दिन पार्टी कार्यालयमा पुगेर गुनासो सुन्ने व्यवस्था गरेको छ ।