भारतको राजस्थान जोधपुरमा एक कारले ड्युटीमा रहेका प्रहरी जवानलाई ठक्कर दियो । ति प्रहरी जवान आफूलाई बचाउन सडकमा रहेको डिभाइडरमा चढे । तर, अनियन्त्रित कारले उनलाई डिभाइडरसँगै ठक्कर दियो । दुर्घटनामा सख्त घाइते भएका उक्त प्रहरी जवानको एम्स अस्पतालमा उपचारका क्रममा मृत्यु भयो । 

प्रहरीले कार चालकलाई नियन्त्रणमा लिएपछि नयाँ तथ्य सार्वजनिक भएको छ । दुर्घटनामा संलग्न उक्त कार एक वकिलले चलाइरहेका थिए । उनी ‘कालो हरिण काण्ड’मा भारतीय अभिनेता सलमान खानविरुद्ध अदालतमा मुद्दा लडेको वकिल महिपाल बिश्नोई रहेको खुलेको छ । उनले बिश्नोइ समाजको तर्फबाट सलमान खानविरुद्ध मुद्दा लडेका थिए । 

हालै बिश्नोई समाजको एक ग्याङले सलमान खानलाई ज्यान मार्ने धम्की दिएको थियो । उक्त धम्कीपछि मुम्बई प्रहरीले सलमानको सुरक्षा व्यवस्था कडा बनाएको छ । सलमानले बन्दुकको लाइसेन्स पाएका छन् भने उनको गाडीलाई पनि बुलेट प्रुफ बनाइएको छ । 

थाना अधिकारी सुमेरदान चारणका अनुसार कुडी भगतासनी थाना इलाकाको नाका संख्या ३ मा राति ड्युटीमा रहेका प्रहरी जवान रमेश सारण डिभाडरको नजिकै उभिरहेका थिए । त्यसबेला १२० किमी प्रतिघण्टाको रफ्तारमा आइरहेको कार अनियन्त्रित भई डिभाइडरमा ठोक्किएको थियो ।