आम निर्वाचनका लागि आजदेखि दल दर्ता शुरू

मंसिर ४ गतेका लागि घोषणा भएको प्रतिनिधि सभा तथा प्रदेश सभा चुनावका लागि आजदेखि राजनीतिक दल दर्ता शुरू हुँदैछ ।

निर्वाचन आयोगले  आजदेखि साउन ३१ गतेसम्म दल दर्ताको समय तोकिएको आयोगका प्रवक्ता शालिग्राम शर्मा पौडेलले जानकारी दिए ।   

आयोगका अनुसार,२०७९ साउन १९ सम्म दर्ता कायम भएका राजनीतिक दलहरू प्रत्यक्ष र समानुपातिक तर्फको निर्वाचन प्रयोजनका लागि दर्ता हुन पाउने छन् । 

दल दर्ता गर्न काठमाडौंको कान्तिपथस्थित निर्वाचन आयोगको कार्यालयमा कार्यालय समयभित्र जानुपर्ने छ ।

दल दर्ताको निवेदन दिँदा राजनीतिक दलको पूरा र संक्षिप्त नाम, स्थापना भएको मिति, आयोगमा दर्ता भएको मिति, केन्द्रीय कार्यालय रहेको ठेगाना, पत्राचार गर्ने ठेगाना, टेलिफोन नम्बर, इमेल, वेबसाइट र सामाजिक सन्जालको खाता समेत खुलाउनु पर्ने आयोगले जनाएको छ ।