नेपाली कांग्रेसकी सांसद रंगमती शाहीले कर्णाली करिडोरअन्तर्गतको सलीसल्लामा बेलिब्रिज बनाउन सरकारको ध्यानाकर्षण गराएकी छन् । आइतवार प्रतिनिधि सभा बैठकको विशेष समयमा बोल्दै उनले कर्णाली करिडोरअन्तर्गत सलीसल्लामा बेलिब्रिज बनाउन आफूले ३ वर्षदेखि सरकारको ध्यानाकर्षण गराए पनि हालसम्म बन्न नसकेको गुनासो गरिन् । 

सरकारका निकायहरूले एकले अर्कोलाई काम लगाएर पन्छिने गरेकाले बेलिब्रिज बन्न नसकेको उनको दाबी छ । सांसद शाहीले जुम्लाका जनताहरूले एम्बुलेन्स चढ्न नपाउन् र बाँदर हिँड्ने बाटोमै हिँडुन् भन्ने सरकारले उद्देश्य राखेको जिकिर गरिन् । 

‘३ वर्ष म सिंहदरबार धाउँदा–धाउँदा हरेक नियम, कानून लागू हुन थाले । बाटै नभएको ठाउँमा पुलहरू बनेका छन् । त्यसमा नियम, कानून केही पनि लाग्दैन रे’, उनले भनिन्, ‘मन्त्रीले सचिवलाई, सचिवले डिजीलाई, डिजीले आयोजना प्रमुखलाई अह्राउनुहुन्छ । आयोजना प्रमुखले पुच्छर हल्लाउँदै बसेका छन् । हुम्ली जनताले अझै पनि बाँदर हिँड्ने बाटोमै हिँडून् भन्ने सरकारको उद्देश्य त्यही हो ।’

उनले हुम्लामा हालसम्म सडक सञ्जाल नजोडिएको, आंगिक क्याम्पस नभएको, विद्युत्को राष्ट्रिय प्रशारण लाइन नपुगेको र सञ्चारको पहुँच नभएको पनि बताइन् ।